Dyn yn gorffen dringo Pen y Fan 365 gwaith mewn blwyddyn

  • Cyhoeddwyd
Des LallyFfynhonnell y llun, PA
Disgrifiad o’r llun,
Fe gyrhaeddodd Des Lally a'i Dad gopa Pen-y-Fan brynhawn Sadwrn

Mae dyn o Aberhonddu wedi dringo mynydd uchaf de Cymru am y 365ain tro mewn blwyddyn.

Mae Des Lally, 43, wedi bod yn cerdded i gopa Pen y Fan ym Mannau Brycheiniog bron a bod bob dydd am y flwyddyn ddiwethaf.

Fe wnaeth hynny beth bynnag fo'r tywydd - eira mawr, gwyntoedd o hyd at 80mya, glaw trwm a thywydd poeth a sych - er mwyn codi arian i ddwy elusen.

Oherwydd nad oedd wedi gallu gwneud y daith pob dydd, mae Mr Lally wedi gorfod gwneud ei ffordd i'r copa fwy nag unwaith mewn diwrnod ar rai achlysuron.

Ffynhonnell y llun, PA
Disgrifiad o’r llun,
Roedd degau o gefnogwyr wedi cerdded i'r copa i groesawu Des Lally wrth iddo esgyn am y tro ola fel rhan o'i her
Nid yw'r BBC yn gyfrifol am gynnwys safleoedd allanolGweld mwy ar Twitter

Mae Mr Lally wedi codi dros £40,000 i elusennau Help for Heroes a Cancer Research UK.

Dywedodd bod y ddwy elusen yn golygu llawer iddo - gyda'i dad wedi treulio 25 mlynedd yn y fyddin a'i ddau riant wedi'u heffeithio gan ganser - ac mai hynny oedd yr unig gymhelliant oedd angen arno.

"Pan dy'ch chi'n troi fyny am naw o'r gloch nos, mae'n dywyll, mae gwyntoedd rhwng 70 ac 80mya, mae'n tywallt y glaw, ry'ch chi ar ein pen eich hun, chi'n meddwl 'dyma ni'n mynd eto'," meddai.

"Ond yr unig beth sydd angen gwneud yw meddwl am y rhesymau chi'n gwneud e a ry'ch chi allan o'r car ac ar eich ffordd yn ddigon sydyn."

Fe wnaeth Mr Lally ddringo'r 500m o'r Storey Arms i gopa Pen y Fan dair gwaith ddydd Gwener er mwyn sicrhau mai dim ond unwaith y byddai'n gorfod gwneud y daith ddydd Sadwrn.

"Mae hi wedi bod yn wych, ac rydw i wedi mwynhau pob eiliad ohono," meddai.

Ffynhonnell y llun, Des Lally
Disgrifiad o’r llun,
Mae Des Lally wedi gorfod gwneud ei ffordd i'r copa fwy nag unwaith mewn diwrnod ar rai achlysuron
Ffynhonnell y llun, Des Lally
Disgrifiad o’r llun,
Mae Des Lally wedi dringo'r mynydd mewn eira mawr, gwyntoedd cryf, glaw trwm a thywydd poeth a sych