Cwpan FA Lloegr: Casnewydd 4-0 Wrecsam

Cyhoeddwyd
Ffynhonnell y llun, Huw Evans picture agency

Bydd Casnewydd yn herio Caerlŷr yn nhrydedd rownd Cwpan FA Lloegr yn dilyn buddugoliaeth gyfforddus o 4-0 yn erbyn Wrecsam yn Rodney Parade.

Roedd 4,000 yn bresennol i wylio'r ddau glwb o Gymru yn ailchwarae'r gêm yn ail rownd y gystadleuaeth yn dilyn gêm ddi-sgor yn y Cae Ras ar ddechrau'r mis.

Dim ond 12 munud i mewn i'r gêm fe dderbyniodd chwaraewr canol cae Wrecsam, Luke Young, gerdyn coch am dacl peryglus.

Pum munud ar ôl yr egwyl fe lwyddodd Padraig Amond i fanteisio ar groesiad Fraser Franks er mwyn penio'r Alltudion ar y blaen.

Roedd y fantais o gael dyn ychwanegol yn dod yn fwyfwy amlwg wrth i Gasnewydd reoli'r chwarae, ac ar ôl 59 munud fe ddyblwyd mantais y tîm cartref gan yr ymosodwr Jamile Matt.

Aeth pethau o ddrwg i waeth i'r Dreigiau pum munud yn ddiweddarach wrth i'r amddiffynnwr, Mark Carrington, daro'r bel i'w rwyd ei hun i selio'r fuddugoliaeth i Gasnewydd.

Dan Butler sgoriodd y bedwaredd i Gasnewydd wrth iddo grymanu'r bêl i gornel isaf y rhwyd yn ystod y cyfnod ar gyfer amser ychwanegol.

Bydd Casnewydd yn herio Caerlŷr yn y drydedd rownd ar ddydd Sul 6 Ionawr.