Ffrwgwd Shane Williams: Staff clwb nos Caerdydd yn euog

Nid oes modd chwarae darnau sain a fideo ar eich dyfais
Mae lluniau CCTV o du mewn i'r clwb yn dangos Shane Williams yn cael ei lusgo i'r llawr

Mae tri o staff diogelwch clwb nos yng Nghaerdydd yn wynebu carchar am achosi ffrwgwd yn dilyn digwyddiad gyda'r cyn-chwaraewr rygbi rhyngwladol Shane Williams a'i ffrindiau.

Cafwyd Dave Wing, 53, a Dean Flowers, 32, yn euog gan reithgor yn Llys y Goron Caerdydd ddydd Llun.

Clywodd y llys bod trydydd dyn - Aled James, 26 - eisoes wedi pledio'n euog i'r un cyhuddiad.

Cafwyd diffynnydd arall - Haydn Morgan, 42 - yn ddieuog o achosi ffrwgwd.

Image copyright Wales news service
Image caption Dave Wing (chw) a Dean Flowers y tu allan i Lys y Goron Caerdydd
Image copyright Wales news service
Image caption Cafodd Aled James ei weld yn taro Dean Williams ar y llawr

Clywodd y rheithgor bod y ffrwgwd wedi digwydd y tu allan i glwb nos Coyote Ugly ar ôl gêm rygbi rhyngwladol yn y brifddinas ar 2 Rhagfyr y llynedd.

Roedd Shane Williams, 41, a'i ffrindiau allan yn dathlu buddugoliaeth Cymru yn erbyn De Affrica, gyda nifer o gefnogwyr Cymru yn gofyn am y cyfle i gymryd llun gydag ef.

Ond clywodd y llys fod un person wedi ceisio defnyddio'i ben i daro Dean Williams, brawd Shane Williams.

Cafodd y ddau frawd a'u ffrindiau eu taflu allan o'r clwb yn sgil y digwyddiad.

Image copyright Wales News Service
Image caption Digwyddodd yr ymosodiad tu allan i glwb nos Coyote Ugly yng Nghaerdydd

Yn ôl yr erlyniad, fe wnaeth y bownsars ddilyn y grŵp allan o'r clwb nos ac ymosod arnynt, gan eu cicio a'u dyrnu.

Mae lluniau CCTV o du mewn i'r clwb yn dangos Shane Williams yn cael ei lusgo i'r llawr, tra bod ei frawd wedi ei adael yn anymwybodol.

Bydd Wing, Flowers a James yn cael eu dedfrydu ar 19 Rhagfyr.

Pynciau Cysylltiedig

Straeon perthnasol