Mark Williams yn rownd derfynol Pencampwriaeth Snwcer

Mark Williams Image copyright Huw Evans picture agency
Image caption Bydd Mark Williams yn wynebu'r Albanwr John Higgins yn y ffeinal

Mae'r Cymro Mark Williams wedi cyrraedd rownd derfynol Pencampwriaeth Snwcer y Byd am y tro cynta ers pymtheng mlynedd.

Mae'r Cymro o Lyn Ebwy wedi bod yn bencampwr byd ddwywaith o'r blaen - yn 2000 a 2003.

Ei wrthwynebydd fydd yr Albanwr John Higgins sydd wedi ennill y bencampwriaeth bedair gwaith.

Fe gurodd Williams ei wrthwynebydd Barry Hawkins o 17-15 ffrâm nos Sadwrn.

Mae Williams yn 43 oed a Higgins yn 42 ac felly enillydd eleni fydd yr hynaf i gipio'r Bencampwriaeth ers i'r Cymro Ray Reardon wneud hynny yn 1978 - roedd e'n 45 ar y pryd.

Ail wynt

Mae'n ymddangos fod gyrfa snwcer Mark Williams wedi cael ail wynt.

Yn ystod y blynyddoedd diwethaf dyw e ddim wedi disgleirio ond ar droad y ganrif ef oedd rhif un y byd.

Mark Williams yw'r chwaraewr diwethaf i fod yn bencampwr tair prif cystadleuaeth snwcer ar yr un pryd - sef Pencampwriaeth y Byd, Pencampwriaeth y DU a'r Meistri.

Bydd y gêm derfynol rhwng Williams a Higgins yn cychwyn brynhawn Sul ac yn dod i ben ddydd Llun.

Pynciau Cysylltiedig

Straeon perthnasol