Arddangosfa i ddathlu hanes Parc Biwt trwy lygaid coeden

Cyhoeddwyd
Disgrifiad o’r llun,
Mae Parc Biwt yn gyrchfan boblogaidd i bobl Caerdydd a'r cyffiniau

Mae arddangosfa sy'n edrych ar hanes un o ardaloedd gwyrdd amlycaf Caerdydd yn agor ddydd Sadwrn.

Bwriad prosiect Y Straeon a Adroddent ydy cyflwyno Parc Biwt drwy lygaid coeden gastan hynafol.

Roedd y goeden dan sylw yn y parc am 132 mlynedd cyn i storm ei llorio yn gynharach eleni.

Yn rhan o'r arddangosfa mae cerdd newydd gan Sophie McKeand, Awdur Ieuenctid Cymru, sydd wedi ei seilio ar straeon gan ymwelwyr â'r parc.

Ffynhonnell y llun, Ymddiredolaeth Tŷ Mount Stuart
Disgrifiad o’r llun,
Un o'r digwyddiadau sy'n cael sylw yw pen-blwydd Pedwerydd Ardalydd Bute yn 21ain oed

"Does dim llawer o bobl yng Nghaerdydd heb stori am Barc Biwt, ond dychmygwch yr hyn allasai coeden a fu yno ers dros ganrif ei ddweud wrthym pe gallai siarad," meddai Victoria Rogers, rheolwr Amgueddfa Stori Caerdydd.

Dywedodd y byddai'r prosiect yn "cydblethu'r straeon hyn nas clywsom o'r blaen" sy'n amrywio o "ben-blwydd Pedwerydd Ardalydd Bute yn 21ain oed i Eisteddfod Genedlaethol 1978, a'r project adfer mwy diweddar".

Mae'r arddangosfa yn rhan o brosiect gan Coed Cadw ac i'w gweld yn Amgueddfa Stori Caerdydd nes 25 Chwefror 2018.

Pynciau Cysylltiedig