Barnwr yn tyngu llw i'r Goruchaf Lys yn Gymraeg

Lord Justice Lloyd Jones Image copyright Supreme Court
Image caption Yr Arglwydd Lloyd-Jones oedd cadeirydd Comisiwn y Gyfraith am dair blynedd

Mae'r cynrychiolydd cyntaf o Gymru i gael ei benodi i'r llys pwysicaf yn y DU wedi tyngu ei lw - a hynny yn y Gymraeg.

Roedd yr Arglwydd Ustus Lloyd-Jones, sy'n 65 oed ac o Bontypridd, yn un o dri barnwr i gael eu penodi i'r Goruchaf Lys ddydd Llun.

Hwn oedd y tro cyntaf i'r Gymraeg gael ei defnyddio yn y seremoni tyngu llw, wrth i'r barnwr wneud hynny'n ddwyieithog.

Yr Arglwydd Ustus Lloyd-Jones, neu Syr David Lloyd-Jones, oedd prif farnwr cylchdaith Cymru cyn iddo gael ei benodi i'r Llys Apêl yn 2012.

Cafodd ei addysg yn Ysgol Ramadeg Pontypridd ac yna Coleg Downing yng Nghaergrawnt.

Image caption Y Goruchaf Lys yw'r prif lys yn y DU

Yn Gymro Cymraeg, ef oedd cadeirydd Pwyllgor Sefydlog yr Arglwydd Ganghellor ar yr Iaith Gymraeg.

Rhwng 2012 a 2015 ef oedd cadeirydd Comisiwn y Gyfraith.

Mae Cwnsler Cyffredinol Cymru wedi croesawu'r penodiad, gan ddweud bod hwn yn "ddiwrnod hanesyddol".

Ychwanegodd Mick Antoniw: "Bydd Yr Arglwydd Ustus Lloyd-Jones yn dod â phrofiad a gwybodaeth sylweddol i'r rôl yma a dwi'n siŵr y bydd yn profi i fod yn aelod gwerthfawr o'r Goruchaf Lys."

Pynciau Cysylltiedig