Shaun Edwards i weithio gyda'r Gleision

Cyhoeddwyd
ffynhonnell y llun, Getty Images
disgrifiad o’r llunMae Shaun Edwards wedi bod yn hyfforddwr amddiffyn Cymru ers 2008

Mae hyfforddwr amddiffyn rygbi Cymru wedi ymuno gyda rhanbarth y Gleision fel ymgynghorydd.

Mae Shaun Edwards eisoes wedi dechrau gweithio gyda charfan Danny Wilson, ac fe fydd yn arwain sesiynau amddiffyn yn rhan amser, a hefyd yn mentora rhai o hyfforddwyr eraill y Gleision.

Bydd yn parhau i fod yn rhan llawn amser o staff Warren Gatland gyda thîm Cymru. Bu yn y swydd yna ers 2008.

Dywedodd prif hyfforddwr y Gleision, Danny Wilson: "Fe fydd Shaun yn ychwanegiad gwych i Gleision Caerdydd.

"Mae'r amddiffyn yn rhywbeth y mae'n rhaid i ni wella os ydyn ni am gymryd cam ymlaen a chyrraedd Cwpan Pencampwyr Ewrop.

Rôl bwysig

Mae gan Shaun gyfoeth o brofiad, ac fe fydd hefyd yn chwarae rôl bwysig wrth ddatblygu hyfforddwyr amddiffyn ac arweinwyr y dyfodol."

Dywedodd llefarydd ar ran Undeb Rygbi Cymru: "Bydd Shaun yn gyswllt cyson rhwng y tîm rheoli cenedlaethol a thîm hyfforddi'r Gleision.

"Byddwn yn gweld effaith ar draws y rhanbarthau gyda'n hyfforddwyr cenedlaethol hefyd yn gweithio gyda'r Dreigiau, Scarlets a'r Gweilch am gyfnodau amrywiol yn ystod y tymor i ddod."

Pynciau Cysylltiedig