Myfyrwyr yn rhoi teyrnged i chwaraewr rygbi fu farw

  • Cyhoeddwyd
Gem

Mae tîm rygbi prifysgol wedi chwarae gêm er cof am chwaraewr gafodd ei lladd mewn gwrthdrawiad ddydd Sadwrn diwethaf.

Bu farw Elli Norkett, 20, oedd yn chwarae rygbi i dîm merched Cymru, ar ôl gwrthdrawiad rhwng Banwen a Glyn-nedd.

Roedd hi'n fyfyrwraig yn ei blwyddyn olaf ym Mhrifysgol Fetropolitan Caerdydd.

Roedd munud o gymeradwyaeth cyn gêm tîm y merched yn erbyn Loughborough ddydd Gwener, yn rownd go-gynderfynol Cwpan Prifysgolion a Cholegau Prydain.

Cyn y gêm, dywedodd yr Athro Richard Tong o Ysgol Chwaraeon y Brifysgol bod yr holl chwaraewyr yn benderfynol o chwarae nos Wener er cof am Ms Norkett.

"Roedd y chwaraewyr yn gwbl sicr am chwarae heno - roedden nhw eisiau chwarae," meddai.

"Fe wnaethon ni siarad gyda'r teulu ac roedden nhw'n awyddus iawn am y cyfle i chwarae - i bawb ddangos y teimladau oedd ganddyn nhw am Elli."

Ffynhonnell y llun, Llun teulu

Yn wreiddiol roedd y gêm ar gampws Cyncoed i fod i gael ei chwarae ddydd Mercher, ond cafodd ei symud i Barc yr Arfau.

Roedd crys Miss Norkett, o Landarsi ger Castell-nedd, ar y llinell hanner cyn y gic gyntaf, ac fe wnaeth aelodau'r garfan osod rhosod arno.