Llongwr yn diolch am achubiaeth ger Ynys Môn yn 1966

Cyhoeddwyd
Ffynhonnell y llun, RNLI
Disgrifiad o’r llun,
Y Nafsiporos cyn i'r badau achub gyrraedd

50 mlynedd ers i griw llong o wlad Groeg gael eu hachub gan fadau achub o Ynys Môn, bydd un o forwyr y llong yn diolch i'r rhai a'i achubodd.

Ar 2 Rhagfyr 1966 aeth criw y Nafsiporos i drafferthion mewn storm oddi ar arfordir yr ynys, ac roedd y llong mewn perygl o ddryllio ar y creigiau.

Roedd gwyntoedd 100 milltir yr awr yn hyrddio ar y pryd, a'r llong mewn tonnau 35 troedfedd o uchder.

Yng nghanol y tywydd garw roedd y criw wedi colli pob gobaith am achubiaeth, ond fe ddaeth neges ar y radio yn dweud: "Mae'n Nadolig. Fe fyddwch yn gweld eich gwragedd a'ch plant unwaith eto."

Roedd y neges wedi ei hanfon gan griw bad achub o Gaergybi, oedd, gyda chriw o Foelfre, ar eu ffordd i achub y 15 Groegwr.

Ffynhonnell y llun, Liverpool Daily Post
Disgrifiad o’r llun,
Dic Evans gyda'r dynion yr oedd ei griw wedi eu hachub yn 1966

Cafodd criw y Nafsiporos eu hachub dros gyfnod o 24 awr, ac fe dderbyniodd yr 17 aelod o griwiau gwirfoddol y badau achub fedalau am eu hymdrechion.

Hyd heddiw, dyma un o'r digwyddiadau mwyaf nodedig yn hanes gwasanaeth yr RNLI.

Nawr, mae un o longwyr y Nafsiporos, Anestis Rokopoulos, sy'n 73 oed ac oedd yn ail swyddog ar y llong y diwrnod hwnnw, wedi penderfynu diolch i'r rhai a'i achubodd.

Bydd digwyddiad yn cael ei gynnal yng Nghaergybi ddydd Gwener er mwyn i Mr Rokopoulos ddiolch i'r dynion ddaeth i gynnig cymorth y diwrnod hwnnw yn 1966.

Ffynhonnell y llun, RNLI
Disgrifiad o’r llun,
Anestis Rokopoulos (canol) gyda'i wraig a'i wyres, yn sefyll ger Dion Theodorou (dde). Cafodd ewythr Mr Theodorou ei achub o'r Nafsiporos hefyd
Ffynhonnell y llun, Nathan Williams
Disgrifiad o’r llun,
Pump o griw bad achub Caergybi oedd yn rhan o'r ymdrech i achub y Groegiaid