Cyfarwyddwr addysg cyngor wedi marw mewn damwain seiclo

Cyhoeddwyd
Ffynhonnell y llun, Cyngor Bro Morgannwg

Bu farw cyfarwyddwr addysg Cyngor Bro Morgannwg, Jennifer Hill mewn damwain seiclo yn Ffrainc.

Yn ôl adroddiadau, fe wnaeth Ms Hill ddisgyn i geunant ym mynyddoedd y Pyrenees ger y ffin â Sbaen ddydd Sul.

Fe wnaeth Ms Hill ymuno â'r cyngor yn 2012.

Mae ei theulu wedi ei disgrifio fel "mam ffyddlon a gwraig hoff".

"Rydyn ni mor falch o'i ymroddiad i'w gwaith a'i llwyddiannau yn y Fro ac yn gynharach yn ei gyrfa," meddai'r teulu mewn datganiad.

Dywedodd Rob Thomas o Gyngor Bro Morgannwg: "Roedd gwaith Jennifer yn cael ei edmygu yn bell tu hwnt i Fro Morgannwg, ac mae ei marwolaeth yn golled fawr i'w proffesiwn."