Rhybuddion llifogydd mewn grym ac oedi i deithwyr

Cyhoeddwyd
Ffynhonnell y llun, aerialpixel.co.uk
Disgrifiad o’r llun,
Llifogydd ger Llanrwst

Mae rhybuddion llifogydd mewn grym yng ngogledd a chanolbarth Cymru ddydd Sul, a nifer o ffyrdd ar gau oherwydd llifogydd.

Cafodd dau o bobl eu hachub ar ôl i'w car fynd yn sownd mewn dwr ger y Trallwng ym Mhowys.

Mae gwasanaethau tren hefyd wedi eu heffeithio yn siroedd Conwy, Ceredigion a Phowys.

Dywedodd Trenau Arriva Cymru na fyddai gwasanaeth rhwng Llanrwst a Blaenau Ffestiniog tan ddydd Llun, ac mae oedi mawr rhwng Machynlleth a Phwllheli.

Ffynhonnell y llun, aerialpixel.co.uk
Disgrifiad o’r llun,
Llifogydd yn Nyffryn Conwy

Roedd y Swyddfa Dywydd yn rhybuddio y gallai hyd at 6cm o law ddisgyn ddydd Sadwrn, ac roedd gwyntoedd o 70mya yng Nghapel Curig.

Mae'r rhybuddion llifogydd gan Gyfoeth Naturiol Cymru mewn grym ar gyfer Dyffryn Dyfrdwy a mannau ar hyd afon Hafren ym Mhowys.

Am y wybodaeth ddiweddaraf ewch i wefan Cyfoeth Naturiol Cymru.

Straeon perthnasol