Tân Romania: Claf yn Ysbyty Treforys, Abertawe

Awyren Nato Image copyright EPA
Image caption Cafodd 12 claf eu hedfan i Brydain a Norwy dros y penwythnos

Mae un o'r bobl gafodd eu hanafu mewn tân mewn clwb nos yn Romania bellach yn cael gofal yn Ysbyty Treforys yn Abertawe.

Roedd y claf yn un o 12 gafodd eu hedfan i Brydain a Norwy dros y penwythnos i gael triniaeth.

Mae cyfanswm o 45 o bobl wedi marw ar ôl y tân yn ninas Bucharest fis diwethaf.

Dywedodd Bwrdd Iechyd Abertawe Bro Morgannwg bod un claf wedi ei gludo i'r adran losgiadau yn Nhreforys.

Er nad oedd y bwrdd iechyd am roi manylion, dywedon nhw bod y claf mewn cyflwr sefydlog.

Mae'n debyg bod y tân wedi ei gynnau gan dân gwyllt gafodd eu defnyddio yn ystod perfformiad yn y clwb nos.

Ddydd Sul, dywedodd llywodraeth Romania bod 30 o bobl yn dal i fod mewn cyflwr difrifol.

Fe wnaeth Prif Weinidog Romania, Victor Ponta, ymddiswyddo ar ôl i 20,000 o bobl brotestio'r wythnos ddiwethaf.