Mesur Cymru: 'Ras i'r gwaelod' medd Plaid Cymru

Cyhoeddwyd
Disgrifiad o’r llun,
Dywedodd Ysgrifennydd Cymru, Stephen Crabb, y byddai Mesur cymru yn cael ei gyhoeddi yr wythnos nesaf

Mae Plaid Cymru yn honni bod anghytuno rhwng Llywodraeth Llafur Cymru a Llywodraeth Geidwadol y DU dros y cam nesaf yn y broses o ddatganoli yn "ras i'r gwaelod".

Dywedodd Simon Thomas AC ei fod yn disgwyl i Fesur Cymru, fydd yn cael ei gyhoeddi'r wythnos nesaf, fod yn "wan".

Ychwanegodd y byddai'n fethiant i'r ddwy lywodraeth os na fydd y mesur yn rhoi pwerau sylweddol i'r Cynulliad.

Mae Llywodraeth Cymru am i'r mesur greu awdurdod cyfreithiol ar wahân i Gymru, ond nid yw Llywodraeth y DU yn gweld angen hynny.

Trafodaethau 'cynhyrchiol'

Mae Prif Weinidog Cymru, Carwyn Jones, wedi awgrymu y byddai diffyg awdurdod cyfreithiol yn lleihau pwerau'r Cynulliad.

Dywedodd Ysgrifennydd Cymru, Stephen Crabb, bod Llywodraeth y DU yn bwriadu cyhoeddi'r mesur yr wythnos nesaf, a hynny ar ôl i Mr Jones alw am ohirio'r broses.

Daw'r cyhoeddiad yn dilyn trafodaethau "pwrpasol a chynhyrchiol" rhwng Mr Crabb a Mr Jones ddydd Llun.

Disgrifiad o’r llun,
Mae Simon Thomas yn disgwyl mesur "gwan"

Dywedodd Simon Thomas nad oedd yn cytuno gyda Mr Jones, ond bod awdurdod cyfreithiol yn "symbol o'r math o bwerau yr ydyn ni eu hangen".

Dywedodd: "Mae'r hyn ddechreuodd fel proses trawsbleidiol wedi troi yn ras i'r gwaelod rhwng y blaid Lafur yma yng Nghymru a'r Ceidwadwyr yn San Steffan.

"O amgylch Whitehall mae adrannau yn ceisio cymryd pwerau yn ôl o dan y model cadw pwerau.

"Rydyn ni'n disgwyl gweld mesur gwan iawn fydd, heb os, yn dechrau trafodaethau gan rai am fesur arall bron yn syth."