Cyngor i ymgynghori ar wahardd ysmygu ar draethau

Sigaret Image copyright Reuters

Mae cynllun i wahardd ysmygu ar draeth yn Sir Benfro wedi cymryd cam ymlaen, wrth i'r cyngor gytuno i ymgynghori ar y mater.

Cyngor Sir Penfro fyddai'r cyngor cyntaf yng Nghymru i greu traeth di-fwg.

Maen nhw'n gyffredin mewn rhai taleithiau yn yr UDA, a hefyd yng Nghanada, Mexico, Japan ac Awstralia.

Bydd y cyngor yn cynnal ymgynghoriad i benderfynu pa draeth ddylai gael ei ddefnyddio mewn cynllun peilot.

Fe wnaeth Cyngor Sir Penfro hefyd bleidleisio i wahardd ysmygu mewn parciau a meysydd chwaraeon - yr awdurdod diweddaraf i wneud hynny.

Mae'n cynnwys gwaharddiad ar e-sigarets.