Ymgeiswyr Llafur yn ceisio cefnogaeth

Yvette Cooper, Jeremy Corbyn, Liz Kendall and Andy Burnham Image copyright Jeff Overs/BBC
Image caption Yvette Cooper, Jeremy Corbyn, Liz Kendall ac Andy Burnham

Mae dau o'r ymgeiswyr ar gyfer arweinyddiaeth y blaid Lafur, Andy Burnham a Liz Kendall, yn ymweld â Chymru ddydd Sul, wrth geisio cefnogaeth aelodau'r blaid.

Fe fydd Mr Burnham yn cymryd rhan mewn sesiwn holi ac ateb gydag aelodau'r blaid yn Wrecsam.

Bydd y cyfarfod yn cael ei gadeirio gan Lesley Griffiths AC, Gweinidog Cymunedau a Threchu Tlodi Cymru.

Fe fydd Ms Kendall yn mynd â'i hymgyrch hi i Gaerdydd.

Fe wnaeth y ddau ymgeisydd arall yn y ras - Yvette Cooper a Jeremy Corbyn - ymweld â Chymru yr wythnos diwethaf.

Bu Ms Cooper yng Nghei Connah ar Lannau Dyfrdwy ddydd Gwener, gan bwysleisio'r angen am greu swyddi o sgiliau uchel.

Fe wnaeth hi hefyd ymosod ar bolisiau Mr Corbyn, yr ymgeisydd asgell chwith, gan ddweud eu bod yn perthyn i'r ganrif ddiwethaf.

Roedd Mr Corbyn yng Nghymru dydd Llun a dydd Mawrth, yn pwysleisio ei neges gwrth lymdra.

Daeth 1,000 o gefnogwyr i'w weld mewn rali yng Nghaerdydd.

Fe gafodd y papurau pleidleisio eu dosbarthu i aelodau ddydd Gwener.

Fe fydd rhaid i bleidleiswyr roi rhif wrth bob un o'r pedwar ymgeisydd yn ôl eu dewis, gyda'r canlyniad yn cael ei gyhoeddi ar 12 Medi.