Ymateb chwyrn i drydariad Cymraeg Aaron Ramsey

Trydariad Aaron Ramsey Image copyright @aaronramsey

Roedd o'n un o arwyr Cymru wrth guro Gwlad Belg yn rowndiau rhagbrofol Euro 2016 yr wythnos diwethaf, ac mae 1.88 miliwn o bobl yn ei ddilyn ar Twitter.

Ond mae un neges gafodd ei thrydar gan bêl-droediwr Cymru ac Arsenal, Aaron Ramsey, wedi derbyn ymateb chwyrn am resymau gwahanol.

Ddydd Llun diwethaf, fe wnaeth y Cymro, aeth i Ysgol Gyfun Cwm Rhymni ger y Coed Duon, drydar llun o'i hun a'i wraig i ddathlu eu pen-blwydd priodas, gyda'r neges "Un flwyddyn heddiw".

Er mai yn Saesneg mae'r rhan fywaf o'i drydariadau, fe wnaeth rhai ymateb yn anhapus gyda'i ddefnydd o'r Gymraeg.

Cafodd Ramsey ei gyhuddo o fod yn feddw gan rai, tra bod negeseuon eraill yn honni i'r trydariad gael ei ysgrifennu drwy gamgymeriad.

Image copyright @BanterousGooner
Image copyright @RightJudgelam

Roedd rhai yn honni nad oedden nhw hyd yn oed yn ymwybodol o'r iaith Gymraeg, neu nad oedd digon o lafariaid yn y geiriau i fedru eu ynganu.

Dywedodd un yn syml mai "gibberish" oedd y neges.

Image copyright @MegatronAFC
Image copyright @argyle_smurf

Fe wnaeth Ramsey rhai cyfweliadau yn y Gymraeg yn gynnar yn ei yrfa, ond erbyn hyn Saesneg y mae'n ei siarad gyda'r cyfryngau gan amlaf.

Er yr ymateb chwyrn gan rai, roedd eraill yn falch bod y pêl-droediwr wedi "dangos balchder" yn yr iaith.

Image copyright @neikaradog
Image copyright @CaiMorgs