S4C yn symud gemau byw yn ôl i nos Sadwrn

Bydd gemau pêl-droed Uwch Gynghrair Cymru yn cael eu dangos yn fyw ar S4C ar nos Sadwrn o'r tymor nesaf ymlaen.

Dywedodd S4C y byddai rhaglen Sgorio yn darlledu gemau o Uwch Gynghrair Cymru am 17:15.

Y llynedd penderfynodd y sianel symud y gêm fyw o ddydd Sadwrn i ddydd Sul i gyd-fynd â lansiad rhaglen chwaraeon Clwb.

Bydd y drefn newydd yn dechrau o 22 Awst ymlaen.

Mae S4C yn dweud y bydd Sgorio yn dechrau am 16:45 "gyda newyddion chwaraeon y dydd a gwasanaeth canlyniadau a rhagolwg o'r gêm".

'Yn falch iawn'

Bydd rhaglen nos Lun, gydag uchafbwyntiau cynghrair La Liga yn Sbaen a gemau Cymru, yn parhau.

Dywedodd Golygydd Chwaraeon S4C, Sue Butler fod S4C yn "falch iawn" o gefnogi pêl-droed Cymru.

"Rydym wedi gweithio'n agos gyda'r Gymdeithas Bêl-droed ac Uwch Gynghrair Cymru i ddatblygu'r ddarpariaeth ar gyfer y gystadleuaeth wych hon ac rydym yn edrych ymlaen at osod ein pencampwriaeth bêl-droed genedlaethol wrth wraidd amserlen nos Sadwrn y sianel."

Dywedodd Prif Weithredwr Cymdeithas Bêl-droed Cymru, Jonathan Ford: "Rydyn ni'n ddiolchgar iawn i S4C am eu cefnogaeth selog i bêl-droed yng Nghymru ac yn hyderus y bydd y slot nos Sadwrn newydd yn denu cefnogwyr i wylio Uwch Gynghrair Cymru."