Pryder am swyddi iogwrt Rachel's Dairy yn Aberystwyth

Rachel's

Fe allai swyddi fod yn y fantol yn Aberystwyth ar ôl i Tesco gyhoeddi na fyddant yn gwerthu iogwrt Rachel's Dairy yn y dyfodol.

Dywedodd llefarydd ar ran y cwmni eu bod wedi dechrau ar gyfnod o ymgynghori 30 diwrnod ynglŷn â diswyddiadau posib. Mae'r ffatri ar ystâd ddiwydiannol Glan yr Afon yn y dref ac mae'n cyflogi 92 o weithwyr ar hyn o bryd.

Bydd yr ymgynghoriad hefyd yn trafod lleihau oriau gweithio.

Dywedodd llefarydd: "Fel busnes rydym yn gwneud popeth o fewn ein gallu i sicrhau prynwyr newydd ar ôl colli cytundeb Tesco, ac rydym yn gwneud popeth o fewn ein gallu i leihau effaith y cyhoeddiad ar ein cwsmeriaid a'r gweithlu."

Mae disgwyl i Tesco roi'r gorau i werthu iogwrt Rachel's Dairy ddiwedd Ebrill.

Dywedodd llefarydd ar ran Tesco: "Rydyn ni'n falch o weithio gyda 70 o gynhyrchwyr lleol sy'n cyflenwi 450 o gynhyrchion i'n cwsmeriaid.

"Rydyn ni bob tro yn gwrando ar yr hyn mae ein cwsmeriaid eisiau ac yn adolygu'r cynnyrch yr ydyn yn ei gynnig i sicrhau bod gyda ni'r gwerth am arian a'r dewis gorau posib.

"Bydd cynnyrch Rachel's Dairy yn dal i fod ar gael mewn rhai siopau yng Nghymru."

Cafodd cwmni gwreiddiol Rachel's Dairy ei sefydlu yn y 1980au gan Rachel Rowlands a'i gŵr Gareth.

Yn 2010 cafodd ei werthu i gwmni Dean Foods o'r Unol Daleithiau yn 2010, ac yna i gwmni Lactalis o Ffrainc yn 2012.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.