Cwest Deepcut Cheryl James: 'Heddlu yn oedi'

Cyhoeddwyd
ffynhonnell y llun, Other
disgrifiad o’r llunBu farw Cheryl James yng Ngwersyll Deepcut yn Surrey yn 1995

Mae teulu soldiwr gafodd ei darganfod yn farw yng Ngwersyll Deepcut yn Surrey wedi cyhuddo'r heddlu o geisio oedi cwest newydd i'w marwolaeth.

Bu farw Cheryl James o Langollen pan oedd hi'n 18 oed wedi iddi gael ei darganfod wedi ei saethu i'w phen yn 1995.

Y llynedd, fe enillodd ei rhieni'r hawl i gwest newydd ar ôl i reithfarn agored gael ei recordio.

Mae BBC Cymru wedi gofyn i Heddlu Surrey am sylw.

Ym mis Chwefror, gofynnodd gyfreithwyr yr heddlu i'r crwner gysidro os dylai cynnal y gwrandawiad ar yr un amser ac unrhyw gwest Deepcut arall yn y dyfodol, wnaeth arwain i ohirio'r achos.

'Ansensitif'

Dywedodd ei thad Des James: "Mae'n ansensitif eu bod nhw yn ei ohirio. Mae hi wedi bod yn anodd iawn i ni gyrraedd y pwynt yma.

"Fe wnes i'r camgymeriad o ymlacio a meddwl y gallwn i ei adael i'r broses gyfreithiol."

Mae Heddlu Surrey wedi gwadu yn y gorffennol mai tacteg yw oedi'r achos, a dywedon nhw eu bod wedi cynnal "cwest trylwyr" i'r farwolaeth.

Roedd Ms James yn un o bedwar soldiwr gafodd ei darganfod yn farw yng Ngwersyll Deepcut rhwng 1995 a 2002.

Cafodd ymchwiliad heddlu ei lansio i'w marwolaethau yn 2002 ar ôl pwysau gan deuluoedd oedd yn gwrthod yr awgrymiadau eu bod wedi lladd eu hunan.