Damwain A470: Ymchwiliad yn parhau

Image copyright Wales News Service

Image caption Bu farw Corey Price, Rhodri Miller, Alesha O'Connor a Margaret Elizabeth Challis yn y ddamwain

Mae'r ymchwiliad yn parhau yn dilyn gwrthdrawiad laddodd bedwar o bobl, a gadael tri o bobl eraill yn yr ysbyty.

Bu farw Alesha O'Connor, Rhodri Miller a Corey Price, y tri yn 17 oed ac o'r Barri, yn y gwrthdrawiad ger Storey Arms, Aberhonddu, nos Wener.

Bu farw Margaret Elizabeth Challis, 66, o Ferthyr Tudful, hefyd.

Mae tri o bobl yn parhau i fod yn yr ysbyty - un mewn cyflwr difrifol ond sefydlog, a dau mewn cyflwr sefydlog.

Digwyddodd y gwrthdrawiad, rhwng car Volkswagon Golf gwyrdd a Volkswagon Golf du, ar yr A470 am tua 22:15 nos Wener.

Cafodd saith o ddynion ifanc - fu'n cael eu holi gan yr heddlu ar amheuaeth o yrru yn beryglus - eu rhyddhau ar fechnïaeth.

Mae cefnogaeth yn cael ei roi i ddisgyblion Ysgol Gyfun Bro Morgannwg a Choleg Chweched Dosbarth Dewi Sant, Caerdydd, yn dilyn y gwrthdrawiad.

Dywedodd teulu Mrs Challis mai'r "plant o'dd ei bywyd hi".