Arlunydd o Sir Benfro wedi marw yn 83 oed

John Knapp Fisher
Image caption Fe symudodd John Knapp-Fisher i Sir Benfro yn 1967.

Mae'r artist o Sir Benfro, John Knapp-Fisher wedi marw yn 83 oed.

Yn adnabyddus am ei ddefnydd o olew a dyfrlliw, mae nifer o'i waith wedi eu hysbrydoli gan olygfeydd yn ne-orllewin Cymru.

Fe'i ganed yn Llundain yn 1931, a symudodd i orllewin Cymru yn y 1960au.

Dywedodd ei deulu fod Mr Knapp-Fisher wedi marw yn Ysbyty Cyffredinol Llwyn Helyg yn Hwlffordd ar ôl bod yn wael ers peth amser, ond roedd wedi parhau i baentio a braslunio tan yn ddiweddar.

Yn fab i bensaer, bu'n astudio celf a dylunio graffeg yn y coleg.

Yn ystod ei 20au daeth yn ddylunydd set theatr ond gadawodd y rôl honno i ddilyn ei gariad gelfyddyd gain.

Yn 1992 cafodd ei ethol yn aelod o Academi Frenhinol Gymreig.