Cyfradd diweithdra Cymru yn gostwng ychydig
Image copyright
Getty Images
Mae'r gyfradd ddiweithdra yng Nghymru wedi gostwng ychydig o'i gymharu â'r ffigyrau gafodd eu rhyddhau fis yn ôl.
Mae ffigyrau diweddaraf y Swyddfa Ystadegau yn dangos bod ychydig yn llai na 100,000 o bobl - cyfradd o 6.7% - yn ddi-waith yng Nghymru rhwng Hydref a Rhagfyr y llynedd.
Roedd ffigyrau gafodd eu cyhoeddi ym mis Ionawr, ar gyfer Medi hyd at fis Tachwedd, yn dangos cyfradd o 7%.
Yn ogystal, roedd 3,000 yn fwy o bobl yn gweithio yng Nghymru rhwng Hydref a Rhagfyr o'i gymharu â'r tri mis rhwng blaenorol.
Ar draws y DU, mae diweithdra wedi gostwng eto, gyda'r gyfradd nawr yn 5.7%.
Dywedodd yr Ysgrifennydd Gwladol Cymru, Stephen Crabb: "Mae'n amlwg o'r ffigyrau yma bod rhaid i ni barhau i weithio'n galed i weld yr effaith positif yn parhau.
"Rydyn ni wedi dweud erioed na fydd yn rhwydd, ac mae her o'n blaenau i sicrhau twf ym mhob rhan o'r wlad."
Er y ffigyrau addawol, mae mwy o bobl allan o waith, neu methu gweithio.
Dywedodd llefarydd ar ran Llywodraeth Cymru: "Mae cyfradd y bobl sy'n gweithio yng Nghymru yn dal i wella, ac yn parhau yn gadarn ar lefel uwch na'r cyfartaledd hanesyddol, ac mae diweithdra yn is na'r amser yma'r llynedd.
"Ddydd Mercher, cyhoeddodd y Gweinidog Cyllid 200 o swyddi newydd sydd wedi cael eu creu â chefnogaeth Llywodraeth Cymru yn Universal Engineering yn Llantrisant. Mae hyn yn esiampl arall o'n polisïau yn gwneud gwahaniaeth."