Teithwyr llong yn rhoi hwb i fusnesau yn Sir Benfro

Cyhoeddwyd
Ffynhonnell y llun, Milford Haven Port Authority
Disgrifiad o’r llun,
Fe wnaeth MS Delphin ymweld â phorthladd Doc Penfro ddydd Sadwrn diwethaf.

Bydd arweinwyr busnes yn Sir Benfro yn rhoi croeso cynnes i long foethus o'r Almaen sy'n ymweld â Sir Benfro ddydd Mercher.

Bydd bron i 500 o deithwyr yn ymweld ag Aberdaugleddau ar ôl i'r MS Astor gyrraedd y porthladd. Hon fydd yr ail o dair llong sy'n ymweld â Sir Benfro o fewn wythnos.

Mae penaethiaid y diwydiant twristiaeth wedi darparu bysiau gwennol yn rhad ac am ddim, er mwyn i deithwyr allu ymweld ag atyniadau fel arddangosfa o geir clasurol a chasgliad o adar ysglyfaethus.

Dywedodd Sue Blanchard Williams o Awdurdod Porthladd Aberdaugleddau bod disgwyl i deithwyr llongau'r wythnos wario tua £120,000.

Fe wnaeth ymweliad y MS Astor ddilyn ymweliad MS Delphin i borthladd Doc Penfro ddydd Sadwrn diwethaf. Bydd y MV Discovery yn cyrraedd Aberdaugleddau ddydd Gwener ar ôl teithio o Lerpwl. Bydd y llong hefyd yn ymweld ag Iwerddon ac Ynysoedd Syllan.

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol