Arddangosfa o waith Tunnicliffe ar gyfer llyfrau Ladybird

Charles Tunnicliffe - Gwanwyn Image copyright Ladybird
Image caption Clawr llyfr What to look for in Spring gan Charles Tunnicliffe

Mae arddangosfa newydd wedi agor yn Oriel Ynys Môn sy'n rhoi cyfle i bobol weld gwaith celf sydd wedi bod yn dal dychymyg plant ers cenedlaethau.

Am bron i ganrif, mae'r llyfrau Ladybird wedi diddori plant ar draws y byd.

Image caption Adar ar do tŷ Tunnicliffe yn Malltraeth

Roedd y llyfrau addysgiadol poblogaidd yn cynnwys gwaith celf rhai o arlunwyr a darlunwyr enwocaf Prydain, gan gynnwys yr arlunydd bywyd gwyllt byd enwog, Charles Tunnicliffe.

Dywedodd Ian Jones, Swyddog Amgueddfeydd Cyngor Sir Ynys Môn: "Mae Charles Tunnicliffe yn cael ei gydnabod ymysg arlunwyr bywyd gwyllt gorau'r ugeinfed ganrif, a chafodd llawer o'i waith ei gynhyrchu yma ym Môn.

"Tra roedd ei gyfraniad i'r byd celf yn anhygoel, fe wnaeth ei ddarluniadau i lyfrau Ladybird hefyd helpu i ddysgu cenedlaethau o blant a phobl ifanc am y bywyd gwyllt o'n hamgylch.

"Rydym yn falch iawn o gael yr arddangosfa wych hon yn Oriel Ynys Môn a hoffem ddiolch i lyfrau Ladybird a Phrifysgol Reading am eu cydweithrediad yn dod â'r casgliad hwn i Fôn."

Y tymhorau

Roedd Tunnicliffe yn ddarlunydd cynhyrchiol iawn ac mae rhai o'i weithiau enwocaf yn cynnwys y gyfres o lyfrau a ddarluniodd i Ladybird. Ei lyfr cyntaf iddynt oedd The Farm, oedd yn rhan o'r gyfres Learning to Read a luniwyd yn arbennig ar gyfer plant ifanc.

Yn fuan wedyn, comisiynwyd yr arlunydd i ddarlunio cyfres o lyfrau natur yn seiliedig ar y pedwar tymor gyda lluniau Tunnicliffe yn darlunio'r testun gan E L Grant Watson. Maent yn mynd â'r darllenydd ar daith drwy'r tymhorau.

Mae'r darluniau yn dangos sut mae anifeiliaid, planhigion a phryfaid yn addasu i'w hamgylchiadau newidiol.

Mi fydd cyfle i weld yr arddangosfa rhwng nawr a mis Rhagfyr.

Image caption Charles Tunnicliffe yn gweithio yn ei stwdio ym Malltraeth