Cymru dan 20 21-35 Iwerddon dan 20

Cyhoeddwyd
Ffynhonnell y llun, Simon Watts
Disgrifiad o’r llun, Colli wnaeth tîm dan 20 Cymru yn erbyn Iwerddon

Mae tîm rygbi dan 20 Cymru wedi colli eu hail gêm ym Mhencampwriaeth Ieuenctid y Byd yn erbyn Iwerddon.

Iwerddon ddechreuodd gryfaf gan sgorio dau gais o fewn 15 munud gan Rory Burke a Garry Ringrose, gyda'r maswr Ross Byrne yn adio'r pwyntiau ychwanegol.

Daeth Cymru yn ôl yn gryfach yn fuan wedyn, wrth iddyn nhw dorri i mewn i hanner Iwerddon sawl gwaith.

Daeth y cais cyntaf ar ôl 21 munud, wrth i'r mewnwr Luc Jones fwydo'r bêl i'r asgellwr Tyler Morgan groesi'r llinell ar yr ochr dywyll. Ciciodd Angus O'Brien y pwyntiau ychwanegol.

Ar ôl cic gosb gan Byrne, dechreuodd blaenwyr Cymru reoli'r sgrym ac ar ôl nifer o giciau cosb, rhoddodd y dyfarnwr gais cosb i Gymru a cherdyn melyn i brop Iwerddon, Peter Dooley. Iwerddon oedd ar y blaen o 17-14 yn yr egwyl.

Munud i fewn i'r ail hanner roedd Iwerddon i lawr i 13 chwaraewr, wrth i Alex Wooton gael ei yrru i'r gell gosb am daro ei ben-glin i gefn O'Brien ar y llawr.

Doedd 15 dyn Cymru methu a manteisio ar rediad Will Boyde ond penderfynodd Cymru i fynd am y sgrym o gic cosb ar ôl i Iwerddon atal y bêl ar y llawr, a llwyddodd yr wythwr James Benjamin i reoli'r sgrym a sgorio'r cais.

Ond doedd Iwerddon ddim am roi'r gorau iddi, a sgoriodd Garry Ringrose ar ôl i eilydd Cymru Tom Williams fethu a chicio i'r ystlys.

Sgoriodd Byrne y trosiad a chic gosb arall i roi mantais o chwe phwynt i'r Gwyddelod.

Wrth i'r gêm symud i'w chwarter olaf, daeth trydydd cerdyn melyn y gêm i Jack Dixon am dacl beryglus.

Methodd Byrne y gic cosb, ond sgoriodd un arall yn fuan wedyn a sgoriodd Cian Kelleher gais ychwanegol pedwar munud o'r diwedd.

Cymru dan 20: Ashley Evans (Gweilch); Tyler Morgan (Dreigiau), Steffan Hughes (capt, Scarlets), Jack Dixon (Dreigiau), Joshua Adams (Scarlets); Angus O'Brien (Dreigiau), Luc Jones (Dreigiau); Nicky Smith (Gweilch), Elliot Dee (Dreigiau), Nicky Thomas (Gweilch), Joe Davies (Dreigiau), Rory Thornton (Gweilch), Olly Cracknell (RGC), James Benjamin (Dreigiau), Will Boyde (Caerfyrddin).

Eilyddion: Scott Otten (Gweilch), Luke Garrett (Dreigiau), Callum Lewis (Gleision), Scott Andrews (Dreigiau), Scott Matthews (Dreigiau), Tom Williams (Gleision), Ethan Davies (Dreigiau), Afon Bagshaw (RGC).

Iwerddon dan 20: Cian Kelleher; Ciaran Gaffney, Garry Ringrose, Dan Goggin, Alex Wootton; Ross Byrne, Nick McCarthy; Peter Dooley, Max Abbott, Rory Burke, Darragh Moloney, Ross Molony, Peadar Timmins, Jack O'Donoghue (capt), Frank Taggart.

Eilyddion: Denis Coulson; Oisin Heffernan, Josh Murphy, Diarmaid Dee, Ryan Foley, Conor McKeon, Harrison Brewer.