Carchar Rhuthun i ymddangos ar y sgrîn fawr

  • Cyhoeddwyd
Carchar RhuthunFfynhonnell y llun, Cyngor Sir Ddinbych
Disgrifiad o’r llun,
Mae Carchar Rhuthun yn cymryd lle carchar Holloway yn y ffilm

Bydd Carchar Rhuthun yn ymddangos mewn ffilm am fywyd y swffragét Emmeline Pankhurst.

Yr actores Meryl Streep fydd yn chwarae rhan Emmeline Pankhurst a bydd Helena Bonham Carter hefyd yn ymddangos yn y ffilm.

Bu criw ffilmio yn y carchar yn ddiweddar yn ffilmio golygfeydd tu fewn i'r adeilad.

Mae'r carchar ar agor fel amgueddfa am ran o'r flwyddyn ac mae hefyd yn gartref i wasanaeth Archifau Sir Ddinbych.

Dywedodd Jane Brunning, Uwch Archifydd, bod y carchar wedi ei adeiladu yn 1866 i'r un dyluniad â charchar Pentonville yn Llundain.

"Ond yn y ffilm mae Carchar Rhuthun yn cymryd rhan carchar Holloway gan nad oedd Holloway ar gael oherwydd ei fod dal yn cael ei ddefnyddio fel carchar," meddai.

Ffynhonnell y llun, Cyngor Sir Ddinbych
Disgrifiad o’r llun,
Adeiladwyd y carchar yn 1866

"Mae Carchar Rhuthun yn cael ei ddefnyddio oherwydd ei bod yn garchar nodweddiadol 19eg ganrif."

Cafodd Emmeline Pankhurst ei charcharu yn Holloway sawl gwaith wrth iddi ymgyrchu i ennill y bleidlais i ferched.

Dywedodd Ms Brunning ei bod wedi mwynhau gweld y ffilmio er nad oedd sêr y ffilm yn bresennol.

"Roedd y diwrnod o ffilmio yn eithaf cyffrous ond yn ddiwrnod hir iawn, yn dechrau am 6am a gorffen am 4pm.

"Alla i ddim aros i weld Carchar Rhuthun ar y sgrîn fawr.

"Bydd yn hwyl ei weld fel rhan o gynhyrchiad mor fawreddog," meddai.

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol