Cap cyntaf i Allen - canfed i Jenkins

Cyhoeddwyd
ffynhonnell y llun, Huw Evans picture agency
disgrifiad o’r llunBydd Corey Allen yn ennill ei gap cyntaf dros Gymru

Mae hyfforddwr Cymru Warren Gatland wedi cyhoeddi pedwar newid i'r tîm a gollodd yn erbyn De Affrica y penwythnos diwethaf i wynebu Ariannin ddydd Sadwrn.

Bydd canolwr y Gleision Corey Allen yn ennill ei gap cyntaf, gan lenwi'r bwlch sydd wedi ei adael oherwydd yr anaf i Jonathan Davies.

Bydd y newidiadau eraill yn gweld Justin Tipuric yn y rheng ôl yn lle Dan Lydiate, prop y Scarlets Rhodri Jones yn lle Adam Jones, a Dan Biggar yn cael ei ddewis o flaen Rhys Priestland.

Ond fe fydd llawer o sylw ar brop y Gleision Gethin Jenkins. Fe fydd y pedwerydd Cymro erioed i ennill 100 o gapiau dros ei wlad.

ffynhonnell y llun, Huw Evans picture agency
disgrifiad o’r llunBydd ennill ei 100fed cap yn achlysur enfawr i Gethin Jenkins

Wrth gyhoeddi'r tîm ddydd Iau, dywedodd Gatland: "Roedd y penwythnos diwethaf yn baratoad da o safbwynt corfforol, gan y bydd hi'n frwydr enfawr yn erbyn Ariannin.

"Fe fyddan nhw'n gobeithio ailadrodd eu llwyddiant y llynedd, ac fe fydd angen i ni fod yn fwy craff er mwyn cael y canlyniad yr ydym yn gobeithio'i gael.

"Ry'n ni wedi bod yn gweithio'n galed i sicrhau ein bod yn manteisio ar y cyfleoedd yr ydym yn eu creu, ac fe fyddwn ni'n annog y chwaraewyr i chwilio am y bylchau.

"Fe fydd dydd Sadwrn yn achlysur enfawr i Gethin (Jenkins) ac yn garreg filltir anhygoel.

"Ry'n ni wedi gorfod gwneud newidiadau oherwydd anafiadau, ond mae'n gyfle gwych i rai.

"Yn safle'r maswr, y bwriad o'r cychwyn oedd cynnig un gêm yr un i Dan (Biggar) a Rhys (Priestland) ar ddechrau'r gyfres, a thro Dan yw hi'r penwythnos yma."

Un arall allai ennill ei gap cyntaf yw prop y Scarlets Samson Lee sydd wedi ei enwi ymhlith yr eilyddion.

CYMRU v. ARIANNIN: Stadiwm y Mileniwm; Dydd Sadwrn, Tachwedd 16; 2:30pm :-

Olwyr:

15. Leigh Halfpenny (Gleision);

14. George North (Northampton), 13. Cory Allen (Gleision), 12. Scott Williams (Scarlets), 11. Liam Williams (Scarlets);

10. Dan Biggar (Gweilch), 9. Mike Phillips (heb glwb);

Blaenwyr:

1. Gethin Jenkins (Gleision), 2. Richard Hibbard (Gweilch), 3. Rhodri Jones (Scarlets);

4. Bradley Davies (Gleision), 5. Alun Wyn Jones (Gweilch);

6. Sam Warburton (Gleision - capten), 7. Justin Tipuric (Gweilch), 8. Toby Faletau (Dreigiau).

Eilyddion:

Ken Owens (Scarlets), Paul James (Caerfaddon), Samson Lee (Scarlets), Luke Charteris (Perpignan), Ryan Jones (Gweilch), Lloyd Williams (Gleision), James Hook (Perpignan), Ashley Beck (Gweilch).

Straeon perthnasol