Gŵyl gerddorol yn helpu dioddefwyr llifogydd Llanelwy

Eglwys Gadeiriol Llanelwy
Image caption Eglwys Gadeiriol Llanelwy yw lleoliad yr ŵyl gerddorol

Bydd Gŵyl Gerddorol Ryngwladol Gogledd Cymru yn Llanelwy eleni yn casglu arian i helpu dioddefwyr y llifogydd yn y ddinas.

Bydd casgliadau ariannol yn cael eu cynnal ar ôl perfformiadau opera am stori Feiblaidd Arch Noa.

Roedd dau berfformiad o 'Noye's Fludde' gan Benjamin Britten wedi cael eu cynllunio ymhell cyn llifogydd y llynedd.

Ar ôl ymgynghori â chyngor y dref, penderfynodd trefnwyr yr ŵyl y byddai'n briodol iddynt ddefnyddio'r achlysur er budd y bobl yr effeithiwyd arnynt.

Dywedodd Maer Llanelwy, y Cynghorydd John Roberts: "Bydd y casgliad ariannol yn dilyn perfformiadau Fludde Noye ar gyfer Apêl Llifogydd Llanelwy yn arwydd gwych gan drefnwyr yr Ŵyl, a rhywbeth yr ydym yn ei groesawu'n fawr iawn."

Image caption Bydd dau berfformiad o 'Noye's Fludde' gan Benjamin Britten yn yr ŵyl

Bydd y cynhyrchiad gan Opera Canolbarth Cymru ar ddiwrnod agoriadol yr ŵyl yn Eglwys Gadeiriol Llanelwy ar Fedi 20.

Bydd yr ŵyl hefyd yn cynnwys y perfformiad cyntaf o waith corawl arbennig i ddathlu pen-blwydd Tywysog Cymru yn 65 oed.

Cyfansoddwyd y gwaith gan y cyfansoddwr brenhinol Paul Mealor a gafodd ei eni yn Llanelwy.

Bydd telynores swyddogol gyntaf y Tywysog, Catrin Finch, a'r delynores frenhinol bresennol, Hannah Stone, yn cymryd rhan yn y perfformiad.

Bydd perfformiadau gan artistiaid eraill yn cynnwys y Swingle Singers, y pianydd Peter Donohoe, ensemble cerddoriaeth gynnar La Serenissima a Cherddorfa Genedlaethol y BBC.

Sefydlwyd Gŵyl Gerddorol Ryngwladol Gogledd Cymru yn 1972 gan y cyfansoddwr William Mathias.

Bu'n ymweld â phob lleoliad posibl yng ngogledd Cymru cyn penderfynu mai yn Eglwys Gadeiriol Llanelwy y cafwyd yr acwsteg gorau.

Bydd yr ŵyl yn dechrau ar Fedi 20 ac yn gorffen ar Fedi 28.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.