Medal wedi 18 mlynedd yn yr Antarctig

Cyhoeddwyd
Ffynhonnell y llun, Tudor Morgan
Disgrifiad o’r llun,
Cafodd Tudor Morgan ei enwi ar restr anrhydeddau'r flwyddyn newydd ym mis Ionawr

Bydd Tudor Morgan o Frynbuga, Sir Fynwy, yn teithio i Balas Buckingham ddydd Gwener i dderbyn medal arbennig am ei waith ger Pegwn y De.

Cafodd Mr Morgan ei enwi ar restr anrhydeddau'r flwyddyn newydd ym mis Ionawr fel cydnabyddiaeth o 18 mlynedd o waith yn yr ardal. Ef yw enillydd y Fedal 'Polar'.

Mae Mr Morgan yn un o ddisgynyddion y teulu oedd yn rhedeg siop enwog David Morgan yng Nghaerdydd, ac fe dreuliodd rhan o'i amser ym Mhegwn y De yn rhedeg siop a swyddfa bost yn Port Lockroy.

Erbyn hyn mae dau arall o Gymru - Kathleen Leavy a'i thad Joe o Gastell-nedd - yn rhedeg y swyddfa bost sydd yr un mwyaf deheuol yn y byd.

Bellach mae Mr Morgan yn ymgynghorydd i Ymddiriedolaeth Dreftadaeth yr Antarctig, ac ers mis Ionawr bu'n gweithio ar ynys Detaille.

Mae'r fedal yn cael ei rhoi i berson sydd wedi gwneud cyfraniad amlwg i wella gwybodaeth am ardaloedd y ddau begwn.

Dechreuodd weithio yn yr Antarctig yn 1994, a dywedodd bod hynny'n gwireddu breuddwyd oedd ganddo ers yn blentyn.

"Mae'n anrhydedd fawr i mi gael y fedal," meddai, "ac yn eising ar y gacen."

Yn y seremoni ym Mhalas Buckingham ddydd Gwener bydd Cymro arall, Andrew Worthington o'r Wyddgrug, yn derbyn OBE am ei waith fel cadeirydd pwyllgor llywio'r gogledd-orllewin i'r Gemau Olympaidd a Pharalympaidd yn Llundain 2012.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol