Sky yn ymestyn cytundeb pêl-droed

Cyhoeddwyd
Ffynhonnell y llun, Huw Evans picture agency
Disgrifiad o’r llun,
Gareth Bale fydd un o'r ser fydd i'w gweld yn fyw ar Sky tan 2017

Mae cwmni darlledu Sky wedi ymestyn eu cytundeb i ddangos gemau pêl-droed Cymru tan 2017.

Bydd y cytundeb yn golygu mai Sky fydd â'r hawl i ddarlledu holl gemau Cymru, gan gynnwys gweddill gemau rhagbrofol Cwpan y Byd 2014 a gemau rhagbrofol Ewro 2016, yn fyw.

Mae'r cytundeb yn cynnwys gemau cartref ac oddi cartref Cymru, ynghyd â holl gemau'r Alban, Gweriniaeth Iwerddon a Gogledd Iwerddon dros yr un cyfnod.

Daeth y cytundeb ar yr un diwrnod ag y cyhoeddodd cwmni ITV eu bod nhw wedi ennill yr hawl i ddangos holl gemau tîm Lloegr ar gyfer Ewro 2016 a Chwpan y Byd 2018.

Yn flaenorol dim ond hawliau'r gemau cartref oedd gan ITV.

Wrth wneud y cyhoeddiad, dywedodd rheolwr cwmni Sky Sports Barney Francis: "Pencampwriaeth Ewrop a Chwpan y Byd yw cystadlaethau rhyngwladol pwysicaf y byd pêl-droed, ac fe fydd y cytundeb yma yn cynnig y darlun llawn i wylwyr Sky Sports."

Ar hyn o bryd mae gan y BBC yr hawl i ddarlledu uchafbwyntiau gemau Cymru ar gyfer BBC Cymru ac S4C.

Does dim manylion wedi eu cyhoeddi hyd yma os fydd y cytundeb yna yn newid yn y dyfodol.

Mae'r BBC wedi gofyn i Gymdeithas Bêl-droed Cymru am ei hymateb i'r cyhoeddiad.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol