Gŵyl Wyddoniaeth Wrecsam wedi'i chanslo

Cyhoeddwyd
ffynhonnell y llun, Prifysgol Glyndŵr
disgrifiad o’r llunCafodd Gŵyl Wyddoniaeth Wrecsam ei chynnal yn flynyddol ers 14 mlynedd

Ni fydd Gŵyl Wyddoniaeth Wrecsam yn cael ei chynnal eleni.

Dywedodd y trefnwyr fod y penderfyniad yn anodd ond bod pwysau ariannol ynghyd â llu o ddigwyddiadau eraill o bwys yn y dref yn ystod 2013.

O'r blaen y trefnwyr oedd Prifysgol Glyndŵr gyda chymorth Cyngor Wrecsam, Coleg Iâl, Techniquest Glyndŵr a Gyrfa Gogledd-ddwyrain Cymru.

Eleni roedd i fod i ddigwydd ym mis Gorffennaf.

Ond mae Prifysgol Glyndŵr eisoes wedi cynnal Gŵyl Delweddau Symudol Myfyrwyr Cymru - Ffresh - ym mis Chwefror a Gŵyl Gomedi Cymru dros y penwythnos.

Bydd y Cae Ras, sy'n eiddo i'r brifysgol, yn cynnal dwy gêm yng Nghwpan Rygbi 13 y Byd ym mis Tachwedd.

Er bod y pwyllgor yr ŵyl yn siomedig maen nhw'n hyderus y bydd yn dychwelyd yn 2014.

'Gweithio'n galed'

Dywedodd y cadeirydd, yr Athro Helen James: "Ar ôl ystyried am hir mae'n ddrwg gan Brifysgol Glyndŵr a'i phartneriaid gyhoeddi na fydd Gŵyl Wyddoniaeth Wrecsam yn digwydd eleni.

"Mae'r ŵyl wedi gweithio'n galed dros nifer o flynyddoedd i sicrhau ei lle fel prif ddigwyddiad cyfathrebu gwyddonol Gogledd Cymru a'r ŵyl fwyaf o'i math yng Nghymru.

"Hoffwn ddiolch i'r holl gefnogwyr a chyfranwyr am eu hymrwymiad i'r digwyddiad dros y 14 blynedd diwethaf, ac rydym yn edrych ymlaen at eu gweld eto yn 2014."