Thomas Cook: Chwe siop o dan fygythiad

Aeth y cwmni i drafferthion yn 2011

Mae cwmni teithio wedi dweud y bydd 2,500 o swyddi'n diflannu a 200 o siopau'n cau oherwydd ailstrwythuro.

Bydd y rhan fwya' o'r swyddi'n weinyddol ond mae'r siopau canlynol yng Nghymru o dan fygythiad: Wrecsam (8 o weithwyr), Glyn Ebwy (4), Crughywel (2), Pontypridd (5), Y Barri (4) ac Aberystwyth (4).

Dywedodd llefarydd: "Dyw hyn ddim yn benderfyniad hawdd ond mae angen i'r busnes er lles y cwsmer fod yn effeithlon ac i'n costau gweinyddol fod yn isel."

Bydd cyfnod ymgynghori am 90 diwrnod yn dechrau'n fuan.

Y bwriad yw cau 195 o siopau ar y Stryd Fawr a thorri swyddi yn eu prif swyddfeydd yn Peterborough a Preston.

Bydd swyddfa Accrington yn cau.

Ar hyn o bryd mae'r cwmni'n cyflogi 15,500.

Aeth y cwmni i drafferthion yn 2011 oherwydd ansefydlogrwydd yn y Dwyrain Canol a Gogledd Affrica ac roedd dyledion o £788m.

Ym Mai 2012 roedd pecyn o £1.4bn yn golygu bod modd ad-dalu dyledion o fewn tair blynedd.