Chwilio am y ffotograffydd Terry Hudson yn Aberystwyth

Cyhoeddwyd
Ffynhonnell y llun, Tom Payne
Disgrifiad o’r llun,
Does neb wedi gweld Terry Hudson ers dydd Iau

Mae timau achub yn chwilio am ddyn 48 oed o Aberystwyth.

Dydi'r ffotograffydd lleol, Terry Hudson, ddim wedi cael ei weld ers dydd Iau.

Ar ôl cais gan yr heddlu fe gychwynnodd timau gwylwyr y glannau o Aberystwyth a Borth chwilio am Mr Hudson ddydd Gwener.

Dydd Sadwrn bu'r chwilio yn ardal Allt y Glais ac mae nifer o ffrindiau Mr Hudson wedi bod chwilio amdano nos Wener.

Dywedodd tîm gwylwyr y glannau eu bod wedi bod yn chwilio am Mr Hudson ers 2.50pm ddydd Gwener a bod bad achub Aberystwyth yn eu cynorthwyo ddydd Sadwrn.

Caiff Mr Hudson ei adnabod gan gyfeillion agos fel Pinky Marvin.

O Birmingham

Mae wedi ei ddisgrifio fel dyn 5 troedfedd 11 modfedd o daldra, yn denau, gyda gwallt du at ei ysgwyddau ac mae'n gwisgo sbectol.

Credir ei fod yn gwisgo cot ddu dros gardigan oren pan aeth ar goll.

Mae'n wreiddiol o Birmingham ond mae wedi byw yn ardal Aberystwyth ers tua 10 mlynedd.

Dywedodd un o gyfeillion Mr Hudson, Tom Payne, bod pobl wedi bod yn chwilio amdano ar hyd llwybr yr arfordir, yr afonydd a'r traethau.

"Fe adawodd ei gartref ar droed," meddai.

"Wnaeth o ddim mynd a'i allweddi na'i ffôn ac fe adawodd y ci yn y tŷ."

Dywedodd bod ei deulu a'i ffrindiau yn bryderus amdano a'u bod wedi creu tudalen ar wefan Facebook i chwilio amdano.

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol