BBC Cymru Fyw

Gwers hanes drwy ddefnyddio'r dechnoleg ddiweddara

Published
media captionAdroddiad Sion Tecwyn
Mae technoleg ffonau symudol yn cael ei defnyddio i esbonio i ymwelwyr pam bod 83 o filwyr o Ganada ym mynwent eglwys yn Sir Ddinbych.
Mae Eglwys y Santes Farged ym Modelwyddan ger yr A55 yn cael ei galw'n yr Eglwys Farmor oherwydd y defnydd helaeth o farmor y tu mewn i'r eglwys.
Ar ddiwedd y Rhyfel Byd Cyntaf, roedd 17,000 o filwyr o Ganada yng Ngwersyll Parc Cinmel yn disgwyl dychwelyd adref.
Epidemig y ffliw achosodd y marwolaethau.
image copyrightHistoryPoints.org
image captionBeddau y milwyr o Ganada ym Modelwyddan
Hyd heddiw mae dirgelwch ynglŷn â marwolaeth pump o'r milwyr fu farw yn sgil terfysg yn y gwersyll ar Fawrth 5, 1919.
Erbyn hyn mae prosiect HistoryPoints.org. wedi gosod codau ymateb cyflym ger y beddau, codau y mae ffonau clyfar yn gallu eu sganio.

'Gaeaf anodd'

Dywedodd Rhodri Clark, sylfaenydd y prosiect: "Mae'r rhesi o feddau rhyfel yn amlwg yn yr eglwys ym Modelwyddan.
image copyrightOther
image captionCafodd yr Eglwys ei chysegru gan Esgob Llanelwy ar Awst 23, 1860.
"Dwi'n gobeithio y bydd ein codau yn addysgu pobol am yr hyn ddigwyddodd yng ngaeaf anodd 1918-19".
Mae modd darllen y wybodaeth yn Saesneg neu Ffrangeg.
Hyd yn hyn mae'r prosiect wedi gosod codau mewn cannoedd o leoedd yng Nghymru.
Yn Sir Ddinbych maen nhw yng Ngorsaf Bad Achub Y Rhyl, pafiliwn Eisteddfod Ryngwladol Llangollen, twyni tywod Gronant a'r hen garchar yn Rhuthun.

'Amgylchfyd'

Dywedodd Mr Clark: "Rydym wedi dethol yr HiPoints ("Historical Points") oherwydd bod rhywbeth diddorol yn eu cylch.
"Wrth sganio'r pwyntiau mewn tref, medrwch ddysgu yn fuan am yr amgylchfyd - sut, pam a phryd y cafodd ei greu, pwy oedd yn arfer byw yno, sut yr oedden nhw'n gweithio a llawer mwy.
"Nid ffurf ar hysbysebu mo HiPoints. Ein partneriaid di-fasnachol sy'n eu dewis".

Straeon perthnasol

  • Dathlu hanes eglwys