Priestland 'allan am hyd at chwe mis'

Cafodd Priestland ei gario o'r cae wrth i'r Sgarlets golli yn erbyn Caerwysg ddydd Sadwrn

Mae'n debygol na fydd maswr Cymru a'r Sgarlets Rhys Priestland yn chwarae ym Mhencampwriaeth y Chwe Gwlad wedi iddo anafu ei figwrn.

Cafodd Priestland, 25 oed, ei gario o'r cae wrth i'r Sgarlets golli 22-16 yn erbyn Caerwysg yng Nghwpan Heineken ddydd Sadwrn.

Cafodd y maswr lawdriniaeth fore Mawrth.

Dywedodd Prif Hyfforddwr y Sgarlets, Simon Easterby, na fyddai Priestland efallai'n chwarae am hyd at chwe mis.

Ar hyn o bryd mae 17 o chwaraewr Cymru wedi eu hanafu, gan gynnwys Adam Jones, Alun Wyn Jones, Jamie Roberts a George North.

Gall yr anaf olygu na fydd Priestland, sydd wedi ennill 22 o gapiau, yn cael ei ddewis ar gyfer taith y Llewod i Awstralia ym Mehefin 2013.

Y gred yw y bydd yr anaf yn gyfle i naill ai maswr y Gweilch, Dan Biggar, neu faswr Perpignan, James Hook, chwarae yng ngêm gyntaf Cymru y bencampwriaeth yn erbyn Iwerddon yng Nghaerdydd ar Chwefror 2.