Gohirio enwi tîm Cymru am 48 awr oherwydd anafiadau

Cafodd Bradley Davies ei anafu yn y gêm wedi chwarae brwnt Andrew Hore

Fydd tîm Cymru ar gyfer eu gêm olaf y flwyddyn hon yn erbyn Awstralia ddim yn cael ei gyhoeddi am 48 awr arall.

Roedd disgwyl i Gymru gyhoeddi'r tîm ddydd Mawrth ond oherwydd anafiadau sawl chwaraewr yn y gêm yn erbyn Seland Newydd mae'r tîm rheoli wedi gohirio'r cyhoeddiad.

Collodd Gymru o 10-33 yn erbyn y Crysau Duon.

Dau yn sicr sydd allan o'r tîm, y prop Aaron Jarvis (anafiadau i'w ben-glin) a'r clo Bradley Davies (anafiadau i'w ben).

Bu'n rhaid i Davies dreulio'r noson yn yr ysbyty nos Sadwrn ar ôl chwarae brwnt Andrew Hore yn yr ail funud.

"Cafodd dipyn o ergyd a fydd e ddim ar gael i ni ar gyfer y gêm yn erbyn Awstralia," meddai hyfforddwr cynorthwyol Cymru, Rob Howley.

"Does dim lle ar y maes rygbi i'r hyn wnaeth Hore.

"Mae'n gwbl warthus."

Mwy o anafiadau

Bydd Hore yn wynebu gwrandawiad disgyblu ddydd Mercher.

Mae 'na bump arall wedi cael eu hanafu.

Doedd y canolwr Jamie Roberts (anafiadau i'w glun) ddim yn ymarfer ddechrau'r wythnos ac mae Ryan Jones wedi cael pwythau oherwydd anafiadau i'w ben.

Cafodd y tri arall, Dan Biggar (ysgwydd), Ian Evans (pen-glin) a George North (clun) anafiadau mewn gemau blaenorol.

Roedd disgwyl i Biggar hyfforddi ddechrau'r wythnos tra bod Evans yn disgwyl prawf ffitrwydd.

Mae North yn dal i wella ac fe allai ddychwelyd i'r tîm ddydd Sadwrn.

Oherwydd anafiadau cyn gemau'r hydref i Adam Jones a Craig Mitchell mae gan Gymru broblem yn y rheng flaen.

Mae dau o chwaraewyr wedi dychwelyd i'w clybiau, Paul James (Caerfaddon) a James Hook (Perpignan).

Ond mae Luke Charteris (Perpignan), Gethin Jenkins (Toulon) a Mike Phillips (Bayonne) wedi aros gyda'r garfan.