BBC Cymru Fyw

Ffarwelio â'r teipiadur olaf

Published
image captionMae'r cyfrifiadur wedi hen ddisodli'r teipiadur ym myd technoleg
Bydd gogledd Cymru yn ffarwelio gyda hen dechnoleg ddydd Mawrth wrth i'r teipiadur olaf i gael ei gynhyrchu ym Mhrydain adael ffatri Brother yn Wrecsam.
Mae'r cwmni o Japan wedi bod yn cynhyrchu teipiaduron yn eu ffatri yn Rhiwabon er 1985, ac ers hynny mae ymhell dros bum miliwn o'r peiriannau wedi dod oddi yno.
Pan sefydlodd y cwmni eu ffatri yng ngogledd Cymru, roedd yna gystadleuaeth gan tua ugain o gwmnïau eraill ar draws Ewrop mewn marchnad oedd yn llewyrchus iawn ar y pryd.
Ar un cyfnod roedd rhwng 250 a 300 o staff yn cael eu cyflogi yn Wrecsam yn cynhyrchu teipiaduron.
Ond yn gynnar yn y 1990au, fe ddechreuodd y busnes arafu gyda dyfodiad cyfrifiaduron, ac erbyn diwedd y ganrif roedd y farchnad yn prysur ddiflannu.
Wrth i'r teipiadur olaf ddod o'r ffatri yn Rhiwabon, dim ond deg o staff sydd bellach yn adeiladu'r peiriannau yno.
Ond ni fydd y teipiadur olaf yn cael ei ddefnyddio chwaith.
Mae'r peiriant - model CM100 - ar ei ffordd yn syth i'r Amgueddfa Wyddoniaeth yn Llundain i fod yn rhan o gasgliad o dros 200 o deipiaduron sy'n dyddio nôl 130 o flynyddoedd.