Cynghorwyr yn Sir Gâr i drafod cynllun fferm wynt

Image copyright (C) British Broadcasting Corporation

Image caption Mae'r cyfarfod yn Neuadd y Sir, Caerfyrddin

Mae aelodau pwyllgor cynllunio Cyngor Sir Gâr yn trafod cais dadleuol i godi fferm wynt 21 tyrbin.

Eisoes mae swyddogion cynllunio wedi argymell gwrthod caniatâd cynllunio i'r cynllun i godi'r tyrbinau ar Fynydd Llanllwni ger Llanybydder.

Aeth cynghorwyr i'r safle arfaethedig fore Mawrth cyn y cyfarfod.

Wrth iddyn nhw ymgynnull yn Neuadd y Sir yng Nghaerfyrddin roedd yr oriel gyhoeddus yn orlawn.

Mae'r cyngor wedi derbyn 370 o lythyrau yn erbyn y cais i godi'r tyrbinau ar dir fferm Bryn Llywelyn.

Mae'r safle o fewn ardal Tan 8.

Llywodraeth Cymru sy'n gyfrifol am bolisi Tan 8, cyfyngu datblygiadau ffermydd gwynt enfawr i saith ardal benodol yng Nghymru.

Cwmni RES sy'n gwneud y cais cynllunio.