BBC Cymru Fyw

Hwb o £5m

Published
image captionDywedodd rhai fod y drefn yn 'gymhleth a dryslyd'
Bydd £5 miliwn ar gael i ariannu cynllun prentisiaethau ar gyfer pobl ifanc rhwng 16 a 24 oed.
Y Dirprwy Weinidog Sgiliau, Jeff Cuthbert, gyhoeddodd hyn.
Daw'r cyhoeddiad wedi i bwyllgor Aelodau'r Cynulliad ddweud nad oedd y defnydd o brentisiaid yn cael "ei wireddu i'w lawn botensial".
Yn ôl adroddiad y Pwyllgor Menter a Busnes, mae prentisiaethau yn hanfodol ar gyfer datblygu sgiliau a hyfforddi'r gweithlu yng Nghymru.
Ond yn ôl tystiolaeth a gasglwyd ar gyfer yr adroddiad, roedd rhai cyflogwyr yn ystyried eu bod yn gost ychwanegol yn lle'n ased i'r cwmni.
Ac roedd rhai yn eu hystyried yn fodd o gael llafur rhad neu'n gynllun ar gyfer swyddi lle oedd angen bôn braich.
'Hwb i'r economi'
Yn ôl y pwyllgor, roedd nifer o gwmnïau bach neu ganolig yn credu bod cyflogi prentisiaid yn gymhleth a dryslyd.
"Mae prentisiaethau yn arf pwysig i Lywodraeth Cymru wrth geisio hybu'r economi," meddai Nick Ramsay, cadeirydd y pwyllgor.
"Rydym yn credu bod mwy o alw am gynlluniau prentisiaeth ac yn croesawu sefydlu uned arbennig o fewn Llywodraeth Cymru i ddelio gyda phrentisiaethau.
"Ond rydym yn credu bod angen symleiddio system a all fod yn gymhleth."
Mae 20 o argymhellion y pwyllgor yn cynnwys:
  • Annog cwmnïau â chynlluniau prentisiaeth i hyrwyddo a rhoi cyngor i gwmnïau llai ynglŷn â chynlluniau prentisiaeth a hyfforddi;
  • Mynd i'r afael â'r ddelwedd a cheisio hyrwyddo brand prentisiaeth ymhlith pobl ifanc;
  • Sicrhau bod pobl ifanc a'u rheini yn derbyn cyngor amserol ac o safon uchel ynglŷn â phrentisiaethau fel eu bod yn gallu gwneud dewis am yrfa neu addysg.

'Galw mawr'

Dywedodd y dirprwy weinidog: "Bydd y £5 miliwn ychwanegol hwn yn helpu'r bobl ifanc hynny sy'n ei chael hi'n anodd cael swyddi ar hyn o bryd.
"Bydden ni ar ben ein digon pe bai galw mawr am brentisiaethau yng Nghymru.
"Dyna pam rwyf yn herio'r Rhwydwaith Dysgu Seiliedig ar Waith i gydweithio â'r cyflogwyr hynny sydd ddim yn darparu prentisiaethau.
"Rwyf am iddyn nhw wybod beth yw buddiannau prentisiaethau ..."

Straeon perthnasol

  • Angen hyrwyddo prentisiaethau yn ôl gwleidyddion