Josie Pearson yn ennill medal aur

Josie Pearson ar ôl ennill y Fedal Aur Image copyright Getty Images
Image caption Torrodd Josie Pearson record y byd

Mae Josie Pearson wedi ennill medal aur yn rownd derfynol taflu'r ddisgen F51-F53.

Ei thrydydd tafliad oedd y gorau, 6.58 meter.

Llwyddodd y Gymraes o'r Gelli Gandryll i sgorio 1122 yn y Gemau Paralympaidd ac mae hi wedi creu record byd newydd.

Catherine O'Neill o Iwerddon oedd yn ail (5.66 metr) a Zena Cole o America (5.25 metr) yn drydedd.

Mae camp Josie ar ôl llwyddiant Aled Sion Davies a Mark Colbourn.

Chwaraeodd hi rygbi cadair olwyn ar ôl torri ei chefn mewn damwain ffordd yn 2003.

Beic llaw

Yn y cyfamser, fe lwyddodd y Gymraes Rachel Morris i ennill medal efydd yn y ras ffordd H1-3.

Image copyright Getty Images
Image caption Enillodd Rachel Morris fedal efydd

Gorffennodd mewn 1 munud 43:08 eiliad y tu ôl i'r Americanwyr Marianna Davis (1 munud 41:34 eiliad) a Monica Bascio (1 munud 42:07 eiliad).

Rachel yw'r beiciwr llaw cyntaf o Brydain i gael ei choroni'n bencampwr dwbl y byd.

Roedd hi a'i chyd aelod o dîm Prydain, Karen Darke, wedi ceisio rhannu'r drydedd wobr wrth orffen law yn llaw.

Ond roedd olwyn beic Rachel, y mae ei theulu'n hanu o Aberdaugleddau, wedi croesi o flaen un Darke a hi gafodd y fedal wedi'r ras yn Brands Hatch.

Mae'r ddwy fedal yn golygu bod athletwyr o Gymru wedi ennill 13 o fedalau, un yn brin o nod Chwaraeon Cymru cyn y gemau.

Straeon perthnasol