Scott Sinclair yn gadael Abertawe ond Sbaenwr yn ymuno â'r Elyrch
Image copyright
Getty Images
Mae Abertawe wedi cytuno ar ffi drosglwyddo fydd yn gweld Scott Sinclair yn gadael Stadiwm Liberty.
Bydd Sinclair yn symud i glwb Manchester City am £6.2 miliwn, ond mae'r Elyrch eisoes wedi symud i lenwi'r bwlch.
Deellir bod Abertawe wedi cytuno ar ffi i brynu'r asgellwr Pablo Hernendez o glwb Valencia yn Sbaen am £5.5 miliwn.
Roedd Abertawe wedi gwrthod un cynnig o £6.2 miliwn am Sinclair, ond mae'r cynnig newydd yn cynnwys cymalau allai weld y ffi yn codi i £8 miliwn gan ddibynnu ar ei berfformiadau.
Sgoriodd Sinclair 35 o goliau mewn 90 gêm i Abertawe.
Ond roedd eisoes wedi dweud na fyddai'n arwyddo cytundeb newydd pan fyddai ei gytundeb presennol yn dod i ben yn haf 2013.
Byddai hynny'n golygu y gallai adael y clwb heb i Abertawe dderbyn ceiniog amdano.
Newydd-ddyfodiad
Mae Pablo, fel y mae'n cael ei adnabod, wedi sgorio 24 o goliau mewn 154 o gemau i Valencia, a hefyd wedi chwarae i glybiau Getafe a Cadiz yn Sbaen.
Fe sgoriodd mewn gêm yng Nghynghrair y Pencampwyr yn erbyn Manchester United yn Old Trafford ym mis Rhagfyr 2010.
Chwaraeodd yr asgellwr 27 oed bedair gêm i dîm rhyngwladol Sbaen, gan sgorio unwaith mewn buddugoliaeth o 5-1 yn erbyn Awstria.
Ef yw'r trydydd Sbaenwr i ymuno ag Abertawe dros yr haf, gan ddilyn Michu a Chico Flores i'r Liberty.
Mae'r tri wedi chwarae i'r rheolwr Michael Laudrup yn ystod ei gyfnod fel rheolwr yn Sbaen ym Mallorca a Getafe.