Clwb Bangor yn colli un o'u harwyr

Cyhoeddwyd
ffynhonnell y llun, BCFC
disgrifiad o’r llunRoedd Bill Souter yn aelod o "dîm gorau Bangor erioed"

Bu farw un o arwyr Clwb Pêl-droed Dinas Bangor, Bill Souter, yn 81 oed.

Roedd Souter yn aelod o dîm Bangor enillodd Gwpan Cymru yn 1962, ac aeth ymlaen i herio Napoli yng Nghwpan Enillwyr Cwpanau Ewrop yn yr un flwyddyn.

Bydd ei angladd ddydd Llun, Medi 3, yn amlosgfa Blacon ger ei gartref yng Nghaer.

Dywedodd Mike Smith, un o gefnogwyr Bangor: "Cafodd Bill ei eni yn Dundee, a chwaraeodd i Burnley a Caer cyn arwyddo i Fangor dan arweiniad Tommy Jones.

"Dyma oedd oes aur clwb Bangor, ac yn ôl pob tebyg y tîm gorau erioed i gynrychioli'r ddinas.

"Mae'n drist iawn clywed bod cysylltiad arall gyda'r tîm eiconig hwnnw wedi ein gadael."

Pen-blwydd

Mae'n gyd-ddigwyddiad trist bod Bill Souter wedi marw wrth i Glwb Pêl-droed Dinas Bangor baratoi i ddathlu hanner can mlwyddiant y gemau yn erbyn Napoli.

Ym Medi 1962, roedd AC Napoli ar frig y gêm yn Ewrop, yn teithio i Fangor yng Nghwpan Enillwyr Cwpanau Ewrop.

ffynhonnell y llun, (C) British Broadcasting Corporation
disgrifiad o’r llunBangor yn dathlu sgorio yn erbyn AC Napoli yn yr Eidal yn 1962

Ond fe aeth rhywbeth o'i le.

Collodd yr Eidalwyr i'r chwaraewyr rhan-amser oedd ar y pryd yn chweched yng Nghynghrair Sir Caer.

Bangor oedd y tîm cyntaf o Gymru i ennill gêm yn Ewrop, o 2-0.

Collodd Bangor yr ail gymal o 3-1 yn yr Eidal, ac o dan y rheolau presennol fe fyddai'r Cymry wedi mynd ymlaen i'r rownd nesaf oherwydd y gôl oddi cartref.

Ond roedd y rheolau'n wahanol bryd hynny a bu'n rhaid cael gêm arall ar gae Arsenal yn Highbury, ac fe gollodd Bangor o 2-1.

Noson Eidalaidd

Bydd cyfres o ddigwyddiadau yn dechrau ddydd Sadwrn, Medi 1, wedi eu trefnu gan Gymdeithas Cefnogwyr Bangor i nodi'r pen-blwydd.

I ddechrau bydd Bangor yn croesawu Aberystwyth i Stadiwm The Book People ddydd Sadwrn ar gyfer eu gêm yn Uwchgynghrair Cymru, ac fe fydd aelodau o gangen Llundain o Glwb Cefnogwyr Napoli yn bresennol.

Wedi'r gêm honno, bydd gêm arall rhwng cefnogwyr Bangor a chefnogwyr Napoli i ddathlu 50 mlynedd ers i'r ddau glwb gwrdd yn Ewrop.

I orffen y diwrnod bydd noson gyda thema Eidalaidd yn y clwb, ac fe fydd y gêm rhwng Bangor a Napoli yn 1962 yn cael ei dangos yno.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol