Cynhyrchiad yn teithio i Taipei

Cyhoeddwyd

Bydd drama Gymraeg yn cymryd rhan yn un o brif wyliau celfyddydol Asia y mis nesaf.

Mae Sherman Cymru a Theatr Genedlaethol Cymru yn mynd â'r ddrama Llwyth, gan y dramodydd Dafydd James, i Ŵyl Gelfyddydol Taipei yn Nhaiwan.

Dyma'r tro cyntaf erioed i'r ddau gwmni berfformio mewn gŵyl cynhyrchiad yn rhyngwladol.

Daeth y gwahoddiad i fynychu Gŵyl Gelfyddydol Taipei yn dilyn perfformiadau yng Ngŵyl Ymylol Caeredin yn 2011.

Dywedodd Arwel Gruffydd, cyfarwyddwr Llwyth a Chyfarwyddwr Artistig Theatr Genedlaethol Cymru, eu bod wedi cael ymateb anhygoel yng Nghaeredin.

Ffynhonnell y llun, Dafydd James
Disgrifiad o’r llun, Drama am bedwar ffrind hoyw yng Nghaerdydd yw Llwyth

"Mae'r datblygiad newydd yma yn gyffrous iawn i'r cwmni wrth i ni fynd a chynhyrchiad Cymraeg ei iaith, sydd wedi bod mor boblogaidd yma yng Nghymru, ar daith i Taiwan."

Bydd un perfformiad o Llwyth yng Nghaerfyrddin ar Awst 23, cyn hedfan i brifddinas Taiwan.

Wedi dychwelyd i Gymru bydd perfformiadau pellach yn Clwyd Theatr Cymru, Yr Wyddgrug, ar Medi 6-7 a Sherman Cymru, Caerdydd, ar Medi 12-14.

Er mwyn apelio i gynulleidfa ddi-Gymraeg, bydd pob perfformiad gydag uwchdeitlau Saesneg.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol