Cau traeth Llangrannog dros dro

Published
image copyrightBBC Wales
image captionMae'r traeth yn un o'r rhai mwya poblogaidd ym Mae Ceredigion

Bydd traeth Llangrannog ar gau am 12 wythnos wrth i Ddŵr Cymru wella system dŵr gwastraff y pentref.

Mae'r gwaith, fydd yn dechrau ar Hydref 1, yn golygu newid 200 metr o bibellau sydd wedi eu claddu ar draws y traeth ac allan i mewn i'r môr.

Bydd maes parcio'r traeth hefyd ar gau am y cyfnod gan y bydd ei angen er mwyn storio deunyddiau a chyfarpar.

Dywedodd Martin Kilroy, rheolwr cyflawni cyfalaf Dŵr Cymru eu bod "yn sylweddoli y bydd y gwaith hwn yn achosi anhwylustod, ond 'rydym bob amser yn ceisio sicrhau bod yna cyn lleied o darfu â phosibl".

"'Rydym yn sicrhau pobl leol y byddwn yn gwneud popeth y gallwn i gwblhau'r prosiect mor gyflym â phosibl."

Fe fydd y pibellau newydd yn cludo elifiant wedi'i drin ymhell i ffwrdd o'r traeth

"Mae hwn yn brosiect pwysig er mwyn sicrhau bod y system dŵr gwastraff yn Llangrannog yn gweithio'n effeithiol a gyda'r effaith leiaf posibl ar yr amgylchedd.

"Fe fydd y dŵr gwastraff 'rydym yn ei ollwng yn parhau i fodloni'r holl safonau ansawdd dŵr angenrheidiol."

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol