Achub dringwr oddi ar Benrhyn Sant Gofan

Image copyright PA

Image caption Cafodd y dyn ei gludo i Ysbyty Treforys yn Abertawe.

Cafodd dringwr ei gludo i'r ysbyty gan hofrennydd wedi iddo ddisgyn 100 troedfedd (30 metr) oddi ar Benrhyn Sant Gofan yn Sir Benfro.

Cafodd y dyn 23 oed o Sir Gaerloyw ei drin am anafiadau i'w belfis, coes a'i frest wedi iddo lithro a dod yn rhannol rydd o'i harnais diogelwch tua 6.45pm ddydd Mawrth.

Dywedodd gwylwyr y Glannau Aberdaugleddau fod timau achub o Benrhyn Sant Gofan, Dinbych-y-Pysgod a Maenorbŷr wedi eu hanfon i helpu'r dyn cyn i'r hofrennydd gyrraedd.

Cafodd y dyn ei gludo i Ysbyty Treforys yn Abertawe.

Rhybuddion

Does dim gwybodaeth am ei gyflwr.

Dywedodd llefarydd ar ran Gwylwyr y Glannau fod y dyn o Wootton-under-Edge, yn dringo gyda ffrind ger Penrhyn Sant Gofan.

"Llithrodd y dyn a daeth dau ddarn o'i gyfarpar diogelwch yn rhydd ond fe gafodd ei ddal gan y trydydd darn tan iddo daro'r creigiau."

Daw'r achub wedi rhybuddion gan Wylwyr y Glannau ynghylch llanw a cherhyntau wedi i dad a'i dri phlentyn gael eu hachub ym Mhenrhyn Gŵyr.