Chwilio eto am gerddwr ar goll

Cyhoeddwyd
ffynhonnell y llun, NWP
disgrifiad o’r llunMae Shayne Colaco yn gerddwr profiadol

Mae timau achub yn chwilio eto am gerddwr sydd wedi bod ar goll yn Eryri ers dydd Sadwrn.

Y gred yw bod Shayne Colaco, 33 oed o Stoke-on-Trent, wedi cychwyn ar ei ben ei hun i fyny mynydd Tryfan ar ôl gadael ei gar yn Nyffryn Ogwen.

Ddydd Mawrth roedd 20 aelod o Dîm Achub Dyffryn Ogwen a 15 o Dîm Achub yr Awyrlu'n chwilio'r ardal.

Ailddechreuon nhw am 6pm nos Fawrth nes ei bod yn tywyllu.

Dywedodd yr Arolygydd Dan Moss o Heddlu Gogledd Cymru: "Ar sail y wybodaeth oedd yng nghar Shayne, rydym yn credu ei fod wedi cerdded o Lyn Ogwen i fyny Tryfan.

"Yna roedd yn bwriadu cerdded yn ôl tuag at Gwm Bochlwyd heibio Llyn Bochlwyd ac ymlaen ar hyd yr A5 i Gapel Curig.

"Rydym yn apelio at unrhyw allai fod wedi ei weld i gysylltu â ni drwy ffonio 101."

Mae Mr Colaco yn gerddwr profiadol a'r gred yw ei fod yn gwisgo dillad tebyg i'r rhai yn y llun y mae'r heddlu wedi ei gyhoeddi.