Cyngor i oedi cyn cyflwyno ysgol ardal

Mae Llanwnnen tua thair milltir o Lanbed

Mae Cabinet Cyngor Ceredigion wedi penderfynu gohirio cynllun i greu ysgol ardal newydd yng nghanol Ceredigion tan o leiaf yr Hydref.

Ym mis Ionawr eleni cymeradwyodd y cyngor y dylid cychwyn ymgynghoriad anffurfiol ynghylch creu ysgol ardal yng nghylch Llanwnnen, Llanwenog a Chwrtnewydd.

Byddai hynny'n golygu cau ysgolion Llanwnnen a Llanwenog a chreu ysgol ardal yng Nghwrtnewydd.

Ddydd Mawrth gofynnodd cyfarwyddwr addysg y sir, Eifion Evans, i'r cabinet oedi cyn gwneud unrhyw benderfyniadau pellach ynglŷn â'r cynllun tan fydd Ymgynghorydd Addysg Annibynnol wedi cwblhau adroddiad ynghylch rhaglen ad-drefnu ysgolion yng Ngheredigion.

Adolygiad

Cafodd yr argymhelliad ei gymeradwyo gan y cabinet wedi i arweinydd y cyngor, Ellen ap Gwynn, ofyn am adolygiad o'r strategaethau a'r polisïau cyfredol oedd yn gysylltiedig â'r rhaglen ad-drefnu ym mis Mehefin eleni.

Ym mis Hydref y llynedd roedd tua 40 o blant yn mynychu Ysgol Llanwnnen a thua 36 o blant ar gofrestr Ysgol Llanwenog.

Rhif trothwy'r cyngor cyn iddyn nhw gymryd camau i gau ysgolion cynradd yw 20 disgybl.

Dydd Mawrth penderfynodd y cabinet gefnogi cais Mr Evans i adael y sefyllfa fel y mae yn y tair ysgol tan fydd yr adolygiad yn gyflawn.

Yn ôl yr adroddiad mae yna gyfalaf o £2.22 miliwn ar gyfer y cynllun i greu'r ysgol ardal i'w ariannu gan "dderbynebau cyfalaf a benthyca darbodus".