Elin Jones yn ddirprwy arweinydd

Elin Jones
Image caption Collodd Elin Jones y ras am arweinyddiaeth Plaid Cymru ym mis Mawrth

Cafodd Elin Jones, Aelod Cynulliad Ceredigion, ei phenodi'n ddirprwy arweinydd grŵp Plaid Cymru yn y Cynulliad.

Roedd hi'n ymgeisydd am arweinyddiaeth y blaid ym mis Mawrth, gan golli i Leanne Wood.

Ms Wood enwebodd Elin Jones am swydd y dirprwy ac fe gafodd y swydd wedi pleidlais y grŵp yn y Cynulliad ddydd Mawrth.

Fe fydd Ms Jones a Jonathan Edwards AS yn cael eu henwebu i fod yn nhîm arweinyddol Leanne Wood.

Y grŵp arweinyddol fydd yn anelu at sicrhau cyfeiriad effeithiol i'r blaid gyfan yn y dyfodol.

'Llawer o barch'

Dywedodd Arweinydd Plaid Cymru, Leanne Wood AC: "Mae Elin yn un o aelodau mwyaf craff a galluog y Cynulliad ac mae gan ei chyd-ACau Plaid Cymru, ac ACau pleidiau eraill, lawer o barch ati.

"Mae Elin a fi wedi gweithio'n agos gyda'n gilydd ers i mi gael fy ethol yn arweinydd ac, fel y disgwyliais, mae hi wedi fy nghefnogi bob cam o'r ffordd ers yr etholiad.

"Rwy'n hynod o falch ei bod hi wedi derbyn fy enwebiad iddi fod yn ddirprwy arweinydd ar ein grŵp ac rwy'n edrych ymlaen at weithio'n llawer mwy agos gyda hi dros y misoedd nesaf."

'Anrhydedd'

Dywedodd Elin Jones AC: "Mae'n bleser mawr gennyf dderbyn y rôl hon fel dirprwy Leanne yn y Cynulliad.

"Mae'n anrhydedd i gael fy ethol gan arweinydd ein plaid ac i dderbyn cefnogaeth unfrydol y grŵp.

"Yn ogystal â pharhau i ymgyrchu dros ddyfodol Gwasanaeth Iechyd Cymru fel llefarydd iechyd ein grŵp, rwy'n bwriadu canolbwyntio fy ymdrechion ar gyrraedd nod Plaid Cymru o wella rhagolygon economaidd ein cenedl."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.