Rhybudd wedi 'digwyddiadau amheus' yn Y Rhyl

Cafodd Gwesty'r Grange ei ddifrodi yn 2008

Mae'r Gwasanaeth Tân wedi rhybuddio perchnogion adeiladau gwag i fod yn wyliadwrus wedi dau dân amheus o fewn dau ddiwrnod.

Cafodd pedair injan dân o'r Rhyl a'r Prestatyn eu hanfon oherwydd tân yng Ngwesty'r Grange yn Y Rhyl am 5.17am fore Gwener.

Roedd digwyddiad tebyg wedi bod yno bedair blynedd yn ôl.

Cafodd tair injan dân o Lanelwy, Glannau Dyfrdwy a'r Fflint eu hanfon oherwydd tân yn Ysbyty Lluest yn yr ardal ar Fai 10 am 00.32am.

Dywedodd y Rheolwr Gostwng Tanau Bwriadol, Kevin Jones: "Mae'n ymddangos bod y ddau dân diweddar yn fwriadol.

'Difrifol'

"Yn ffodus, chafodd neb ei anafu ond mae'r digwyddiadau'n ddifrifol gan y gallai bywydau fod wedi eu peryglu heb yn wybod i neb.

"Gan fod diffoddwyr wedi eu galw roedd bywydau mewn perygl."

Dywedodd na fyddai'r gwasanaeth yn goddef tanau bwriadol.

"Rydym yn cydweithio'n agos â'r heddlu a bydd troseddwyr yn cael eu herlyn."

Dylai unrhywun â gwybodaeth ffonio'r heddlu ar 101 neu Taclo'r Tacle'n ddienw ar 0800 555 111.