Twitter: Arestio pedwar arall

Cyhoeddwyd
Ffynhonnell y llun, Other
Disgrifiad o’r llun,
Cafodd Ched Evans ei garcharu am bum mlynedd am dreisio

Mae Heddlu'r Gogledd wedi arestio pedwar dyn yn Sheffield ar ôl i enw menyw gafodd ei threisio gael ei gyhoeddi ar y we.

Cafodd dau eu harestio ar amheuaeth o gyfathrebu maleisus a dau ar amheuaeth o geisio gwyrdroi cwrs cyfiawnder.

Cafodd y pedwar, rhwng 19 a 30 oed, eu holi yn Sheffield cyn cael eu rhyddhau ar fechniaeth.

Cafodd enw'r fenyw ei ryddhau ar ôl i lys gael y pêl-droediwr Chad Evans yn euog o'i threisio mewn gwesty yn Rhuddlan, Sir Ddinbych.

Hyd yn hyn mae 16 wedi eu harestio yn y gogledd a Sir Efrog, a dywedodd Heddlu'r Gogledd y byddai mwy'n cael eu harestio.

Pum mlynedd

Cafodd Ched Evans, oedd yn chwarae i Sheffield United, ei garcharu am bum mlynedd am fod yn euog o dreisio'r fenyw 19 oed.

Y penwythnos ar ôl yr achos cafodd enw'r fenyw ei ryddhau ar wefan Twitter.

Mae gan ddioddefwyr sydd wedi eu treisio neu'n diodde' o ymosodiadau rhywiol yr hawl i fod yn anhysbys am oes.

Mae Evans, sydd hefyd wedi cynrychioli Cymru, yn dweud y bydd yn apelio yn erbyn y dyfarniad.

Straeon perthnasol

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol